3尾兔仔：25/3/3

司公鈃仔花、母語日、神秘列車、韓良露
1去好民文化提228台灣司公鈃仔花buh-ló͘-chih，228彼工pín佇揹仔頂。學校課本共288佮白色恐怖寫甲傷簡單，毋是省籍衝突爾爾，是苦難的開頭，紲落來台灣承受38年的戒嚴佮白色恐怖。
梓冊房逐年有手製繪本展，大約佇8月，幾若个冊店輪流展。讀著黃郁欽的作品《消失的紀念日》，紀念288彼工消失的人。過去無228這工，共有影的代誌講做無影，對人足有害。
轉型正義愛完成愛公佈真相，到今真相佮史料猶無法度公開。有一大陣人的死甲不明不白。有足濟人青春去了了，坐獄十幾年，猶是毋知啥人共in監視，啥人共in陷害。

去看好民的二七部隊展。228是屠殺。國府軍隊軍車鬥機關銃，3月3日早時沿街掃射，臺中市鬧熱的街仔路。讀著遮的資料，我頭殼內走出，neftlix《百年孤寂》保守黨軍隊攻入馬康多，亂刣無辜民眾。毋是干焦舞政治的人受害，平民嘛受難，死甲足冤枉。228是逐家愛關心的代誌。

推薦司公鈃仔花的《假使我是一个女人》，取材自蔡志愿先生佇監獄寫的自白書。伊讀左派的冊有罪，22歲銃殺死。

2以早有人共我講，𪜶老母講華語，伊的「母語」就是華語，毋免閣去學「母語」。母語有悖論，若是母語就是老母講的話，母語哪會斷去？照這款推論就免有母語日啊。
我想我的母語是狗語，阮阿媽定共我：「偶會縮狗語，偶有讀朱。」
母語毋taⁿ是老母的話，是土地長久的話。照歷史來看華語干焦是這七十冬爾爾，過去台灣講台語有三百冬，台語是報紙上早印的文字。會曉台語才通共台灣知甲透機。若是知原住民話就是千年的歷史。
理性佮人說教的文字，我上討厭。台語予我愛直直佮人說明。講台語嘛會害我予人笑，我的台語猶無夠好、無夠完美。逐家較鼓勵人講華語，對母語足嚴格，講甲無夠好就愛人莫講，毋過無講哪會好咧？

3逐个縣市都有中正路佮介壽路，毋過咱會記得幾个白色恐怖受難者？
甘耀明的《神秘列車》是我心中，上好的白色恐怖作品。漫畫家森森 Sen佮編劇食夢蟹合作改編做漫畫。故事中阿公有自由的思想，予政府掠去關。坐獄十幾年轉來厝裡，子女無諒解，時代猶禁忌。伊講故事去予孫仔聽：「有一台火車無寫佇時刻表，載你去——火燒島。」孫仔戇戇想，阿公講的火車敢有影？記持隨火車一節一節倒轉去，愈來愈恐怖，愈來愈倚近阿公真實的過去。《神秘列車》上予人心酸的所在，就是這个故事毋taⁿ是故事。

4今仔日3月初3是韓良露忌日，有十冬矣。
知影伊過身，我感覺胸坎足絚，彼陣我干焦知影伊是美食作家。了後讀伊的占星冊，是我讀過上心適的，讀甲心肝穎仔入去。伊寫文化人士做例真濟，嘛算是另類台灣文人史。