3尾兔仔：25／2／13

火燒厝、揀啊揀、華麗島民話集

1 頂禮拜五聽tio̍h火災警報。進前都是liang假的，演習抑是故障彼款，這改到底有影抑無影。我拄睏醒，兔仔倚來枕頭邊仔，共我sai-nai。當咧聽寶島少年兄，旺將欲轉去矣，我那摸Pong--ê那感慨。這警報liang遮久無停，去看厝邊按怎，拄好有人對樓頂chông落來，共我講地下室著火。
我連鞭去提紮兔仔出去的藍色籠仔，順紲叫室友，chhōa in兜一隻狗仔兩隻貓仔好去避難。Pong --ê看著彼跤籠仔足無歡喜，走予我逐。猶未鼻著臭火焦味，我著緊張甲欲死。我穿睏衫，籠仔揹咧，錢包、銀行簿仔紮咧，趕緊逃生，一樓有臭味無看著火。阮兜公寓頭前彼條巷仔，頭一擺遮鬧熱遮濟人，狗仔嘛足濟隻。
厝邊阿婆煩惱我講：「你蹛二樓走遐慢。」我怪講兔仔僫掠。論真是我無要意警報，我學著毋管有影無，聽著警報走就著。
消防車佮救護車來真緊，火無蓋嚴重，現場氣氛顛倒悠哉仔悠哉，袂輸逐家約好，同齊來曝寒天的日頭。
火無一下仔就拍化去，我心內煞袂平靜。兔仔無驚著，敢若毋知有火災。心情䆀甲，若聽著恁兜火燒厝這塊歌，我會起tu̍h-lān。
這個月我有一頂帽仔、一領褲佮一粒手指拍毋見，本底我揣甲人真煩。火災了後，規間厝無燒燒去，人佮兔仔都平安，物仔無去閣買就好，我足𠢕安慰家己。
今仔日台中氣爆，我罕得去新光三越，彼搭我較愛去tiger city看冷門電影。有時仔經過遐，就會去買大誌。遐算是台中地標，今按呢予人真稀微。台中的公安意外，常在一下仔就無人探問，教訓若無記牢，無偌久閣會發生差不多的代誌。

2去挽刺波仔。
想欲去刺波仔園有幾若年，毋過時間都無拄好。讀《杯底不養金魚：美酒環島日記1》，故事有se̍h到大湖食刺波仔酒，予我有動力來計畫一下，我這个人就是足好洗腦。《宛如阿修羅》有壽喜燒我就來煮，《葬送的芙莉蓮》有大塊漢堡肉，我嘛來捏肉丸仔來煎。
揣一間台中市四箍圍的刺波仔園，草莓世界攏總有，有酒嘛有煙腸。那挽刺波仔那唱司公鈃仔花的〈龍眼〉：「揀啊揀／揀著上甜的龍眼／揀啊揀／揀著上媠的風景」我傷暗去，無啥大閣熟的刺波仔通好挽，唱咧唱咧感覺真好。《萬事美妙》這个專輯，我愈聽愈佮意。有時仔我批尾會祝福萬事美妙，實在太美妙啊。

3我看著民間故事的冊就想欲買。踅冊展看著《花束集，捷克民族傳說集》，就感覺是好物仔。這改就來推薦《華麗島民話集》。我認為西川滿的才能毋是寫作，我閣較欣賞伊做雜誌，研究台灣民俗的成果。致良出版社的版本有包池田敏雄的版畫。這本冊向小學生徵稿，佇當時遮的故事迵人知，毋過內面大部份的故事，我攏無聽人講過，讀起來足心適。可比講連鵝頭頂的瘤，就有一个典故。


《華麗島民話集》