3尾兔仔：9／23

家己褒，較袂臭臊

1菜店頭家講菜真鮮，魚店頭家講魚仔鮮沢，俗語講：「家己褒，較袂臭臊」。梓冊房店頭家共我講伊拄著奇怪的人客。彼人客欲買一本冊寄予關佇監獄的朋友，毋過人客無咧讀冊所以一本一本問頭家敢好看，頭家逐本攏講好看。人客無主意，落尾頭家推薦伊買乙一的《暗黑童話》。印象中彼是一本我掠無頭摠的冊。故事足怪奇，肉體hōng殘忍分解了後猶活咧，接別人的身體來共生，按呢殘酷的組合所產生的愛情，我無蓋了解，但是記牢牢，大概仔是想袂透的緣故。

趕佇現流搬新厝進前去一改。我買《錦荔枝的滋味》。本底對草地艱苦人的故事無啥興趣。讀作者洪淑昭翻譯的《傲慢佮偏見》，這是前衛少年世界文學中翻譯甲上有台語氣的作品。洪淑昭的功力不得了。連有聲冊嘛是這系列中表演甲上媠的。

我提這本冊去結數的時，現流頭家直直褒，褒甲落尾伊講：「這本冊leh講……，m̄……，我無看過橫直就是足讚的！」

洪淑昭觀察人情世事足幼路，會當講是台灣講的櫻木紫乃。廣播劇嘛好聽甲，表演的氣口佮用詞媠甲會觸舌，袂輸偷聽菜市仔大兄大姊咧開講。

2 Ma-ioh-ne-chuh （マヨネーズ）予我傷心。

用生卵甲油手抐，果汁機絞，袂奶化就是袂。試甲第三粒卵猶袂濫油，有糖佮檸檬，拄好透柳丁汁做蛋蜜汁。

3 王昭華佇訪問中講，伊起頭寫台文按怎攏khê-khê，伊眠夢著講台語的夢了後就順矣。我暝日祈禱予我一个台語夢。自Türkiye轉來三冬偌，我嘛是不時夢著講土語的夢，人閣轉去Türkiye讀冊。現實中我佮土人朋友無閣聯絡，生活中嘛無講著土語，我親像猶牢佇遐。頂禮拜五我總算有台語夢矣！！！我夢著一个台語真媠氣優雅的阿媽，（親像文英阿姨）佮伊的查某孫講台語，in孫用臭奶呆的台語應。現實中我聽著幼囡仔講台語，是壯三新涼樂團的囡仔演員，大概是歷史上上蓋幼齒的樊梨花（大約十歲），佮伊的查某𡢃仔（大約七歲）。阿媽佮囡仔講台語，囡仔用台語應誠實是眠夢，這馬的阿媽攏嘛對孫仔講華語。