3尾兔仔：9／13

1 揤退片切á，底片計數開始倒退。咱定定有感時間拚命向前加速，真少有倒退鑢ê感覺。先生講日本時代ê小說kap以早傳統小說有啥物精差？就是時間，日本人來了後才有時鐘ê時間，精準ê時間就是現代化。

以早ê時間無切做遐細一格，是節氣，是日頭，是星行ê位。

寫作ê時f我盡量無用時間這个詞去表現時間過去。佇《幕然回首》中時間是景色ê變化。揣出時間徙動ê痕跡，就是觀察ê細節。

2 揣台語節目聽。聽《大倫有大量》，開場講：「我相信有一工講台語mā會通。」就是bē通才向望會通，真予人感慨。

却tio̍h 2年前陳明章ê訪問，才知逐年伊lóng會tī北投辦月琴（ge̍h-khîm）節。《寶島少年兄》七號親像有講伊tī月琴節熟似chit-má ê某。我m̄知月琴節是一个逐年有ê好活動，koh是規个九月lóng有遮讚ê活動。我頂禮拜去北投，在先去瀧乃湯浸溫泉，食暗了後舒適去溫泉博物館聽歌。壯三新涼樂團表演ê本地歌仔，in是現今唯一一个表演宜蘭本地歌仔的團體。我頭一改看本底歌仔。進前我聽人講歌仔戲是Opera我m̄是蓋認同，歌仔戲不離仔親民，歌劇應當是較難，需要文化資本才通欣賞ê物件才是。

本底歌仔確實是台灣ê Opera，in唸白kap唱曲ê用詞lóng比較難，唱曲ê時我就聽無蓋有。衫仔m̄是尪仔頭配長衫，是平民ê大襟衫，無華麗ê衫仔跤步手路koh較幼路。重點是現場有月琴伴奏，8个樂師，平常時廟埕看戲無遐豐沛。本底歌仔koh號做落地掃，聽過一擺就知，彼話講kah澀koh鹹koh笑詼，足趣味。莫怪林茂賢先生遮爾愛本底歌仔。

却tio̍h 2年前陳明章ê訪問，才知逐年伊lóng會tī北投辦月琴（ge̍h-khîm）節。《寶島少年兄》七號親像有講伊tī月琴節熟似chit-má ê某。我m̄知月琴節是一个逐年有ê好活動。我頂禮拜去北投，在先去瀧乃湯浸溫泉，食暗了後舒適去溫泉博物館聽歌。壯三新涼樂團表演ê本地歌仔，in是現今唯一一个表演宜蘭本地歌仔的團體。我頭一改看本底歌仔。進前我聽人講歌仔戲是Opera我m̄是蓋認同，歌仔戲不離仔親民，歌劇應當是一寡有程度才通欣賞ê物件是才是。

阮兜附近ê廟有請小金枝劇團來演戲。我感覺看過小金枝，不離仔有本地臺中人ê感覺。

3 Henry Darger 是我唯一一个去美國耍ê動力。去民間藝術博物館看伊ê畫。黃色敢是起痟ê色水？親像〈黃色壁紙〉。伊ê畫有風尚雜誌輕快ê氣息，史詩ê大場面kap殘酷。Henry kā家己ê姓改做Dargarius，彼是伊逃避現實痛苦ê方法。看tio̍h這段我真有同感，現今有人叫我本名，我感覺親像leh叫另外一个人。我無去改名是因為m̄管按怎lóng愛用老爸抑是老母ê姓，這予我ê改名變kah一點意義mā無。若我是美國人會當改名做X，橫直tùi烏人來講所有姓全是奴隸主白人ê姓。對我來講真名若m̄是透底改名，按呢不如繼續用舊ê，一个平庸名字就是上好ê真名。

Henry直直受tio̍h見笑ê折磨。

我定定lak入見笑ê深坑，自省後悔真久koh peh bē起來，彼種為家己這个存在深深厭siān、怨恨ê感覺，bē-su一大陣狗蟻peh上背，癩ko發冷。想bē到家己這款跤數，產生ê想法koh人想欲聽。 後來我聽tio̍h《新資料夾》ê烏歷史特集，tùi家己做過ê白痴代較放會過，畢竟愛比白痴，一山koh比一山白痴，ài做白痴頭名mā無遐簡單（毋是 大概活leh ê逐工lóng是leh創作烏歷史，喔，上少有活過。

Henry ê見笑是大kah伊講bē出來。見笑、侮辱、痛苦成做長長長ê作品，60年換十幾萬頁ê大作品。伊所忍受ê艱苦是bē-tàng想像ê大。伊沬入想像中，tī幻想中重生。當伊活leh大概是真歹鬥陣ê人，伊ê作品怪kah不思義。M̄管是伊ê作品抑是傳記lóng真吸引我。

૮₍｡ •᎔• ｡₎ა૮₍｡ •᎔• ｡₎ა૮₍｡ •᎔• ｡₎ა