3尾兔仔6／23／25
Tâigael、TIDF、Zinzindurrunkarratz
Tâigael、TIDF、Zinzindurrunkarratz
1決定怙台語做創作語言，有覺悟這三冬攏接袂著寫作的工課。
出版？免數想。邀稿？食較䆀。
我這個月有冊出版，後個月7月12（六）佇台南有新冊發表會，菩薩保庇喔。後半年有參展，嘛愛寫一篇短篇台文小說。
Tâigael這個月出版，細細一本，有4種語言，台語、華語、英語佮蘇格蘭語，為著到對方的語言（蘇格蘭）翻譯閣翻譯。聽著Lisa朗讀chín神奇，故事成做我完全聽無、足生份的聲說。蘇格蘭語聲嗽較𠕇，台語較軟。故事去假遠兜，我猶未去過的地頭。
愛感謝Wind&Bones Books邀稿用心編輯，蘇格蘭政府的蘇格蘭連結基金（ Scottish Government’s Scottish Connections Fund）和蘇格蘭創意機構（Creative Scotland）贊助，閣有阮小弟Khu chùn siâng台文潤稿，若無伊我的作品就毋成樣。
阮伴講這改四个參與的4个作家都是查某的，果然是母語。
〈4：44：44〉紹介佮朗讀：https://taigael.com/kiukiong/
2 TIDF看十捅部片，主題有女性、政治迫害、緬甸佮烏克蘭戰爭。
《基輔穹頂下的玫瑰》足媠看甲足暢，毋過背景是露西亞侵略。Dakh daughters團員是7个查某藝術家，表演結合劇場佮音樂，世界音樂十外種語言，嘛有烏克蘭民謠，多元閣在地的奇團。抗爭現場的劇場表演，印象中台灣的行動劇倯閣無局，Dakh daughters完全無仝予人醒過來，藝術遐爾有力。電影拄放我就迷甲深深。
《蜻蜓飛過的歲月》片名臆無咧講啥，本底欲閬過，紹介講是南韓女高中生考學測，我才決定去看却著寶。這部片誠意滿滿。大學著決定人的價值？我欲按怎揣著家己的價值？這是逐个人攏會拄著的人生大栽問。
看咧看咧，發見導演洪多藝的朋友，有人無閣出現，高中翕的紀錄片，錄著朋友最後幾年的身影。導演的好朋友是三人團體，自殺的朋友順利考著理想的大學，導演佮另外一个朋友重考。英語片名是Saving a Dragonfly，有田嬰
飛入教室，毋過窗仔袂當開（為著防止學生跳樓），田嬰挵窗仔甲死。高二彼陣隔壁班有人自殺，無人討論抑是毋敢去問。考試競爭，導演翕紀錄片，身軀邊的大人先生都無支持，考試上重要，做其他代誌浪費時間。關心有人自殺嘛是浪費時間。這馬回想佳哉有翕紀錄片，過身的人袂閣轉來。
失去價值，失去標準答案，茫茫渺渺。有一座橋足濟人自殺，導演徛佇遐，警察看著共伊chhōa走。過一年了後，導演問爸母彼陣的狀況，車仔裡爸母共導演會失禮，毋知逼伊重考大學予伊真艱苦，伊活咧就好，這段足感人。這个時代，足濟人爸母的愛有條件，愛考著啥物大學，做啥物款的工課，有偌有孝，足濟人得袂著無條件的愛。我看著這段，感覺有解脫咱追求價值的束縛。
《南韓民主家政課》，導演阿爸是中央的高層公務人員，阿母是女性主義者諮商師，處理家暴、性暴力等等的個案。in阿爸是較美滿的《薄荷糖》。電影翕甲落尾，in母看起來真有精神，參與抗議。顛倒in阿爸愈來愈臭老，公務員執行精差，活佇政治中心，煞袂當表達家己的政治看法。這部片的導演南雅琅佮洪多藝年歲差不多，讀仝一間藝術大學。in咧校園做抗議布條，有幾秒的鏡頭翕著洪多藝。兩部片的時光交會。看著這段感覺足親密。我佮in嘛算是仝沿的。
3《颼颼咚隆喀嗞》Zinzindurrunkarratz，我無細膩看甲睏去（十分鐘左右），猶是足迷人的紀錄片。阮隔壁的，睏甲kōⁿ-kōⁿ叫，閣直直反身揣好睏的角度，可惜這是電影院袂比厝內眠床較好睏。這部片有三分二的時間恬寂寂，觀眾小可動一下就誠鑿耳。
切做50外的片段，親像踅博物館，拍開一个一个寶盒，物品佮紹介，重點收藏：聲音。熱天牧羊人chhōa羊仔去山頂食草，遐叫做Zinzindurrunkarratz是這搭的聲音的地景，Zinzin是風微微仔吹，durrun是石頭落入崁，karratz是雷公khà著山頂彼大塊禿岩。導演重新行41年前，老爸去Zinzindurrunkarratz補給牧羊人的路線。牧羊人愛收音機，樺木桶佮漏仔做牛奶，揣師傅注文。驢仔揹物仔的橐仔、牧羊人的家私，隨這个行業落勢嘛欲失傳去。古早Zinzindurrunkarratz上濟有一百外个牧羊人，今chhun一个老牧羊人猶咧做。
記錄欲消失的文化、人佮物仔，博物學的正經意義。
有一段是牧羊人會記lih伊所有羊仔的叫聲，這句話親像詩。伊學羊仔叫，有懸有低有粗有幼，逐隻都無仝。
導演怙老爸四十年前的攝影機Supper8，配過期二十年的短片毋知敢有效，愛奇蹟，這段配教堂的影像。
旅伴Paolo驢仔（lû-á）有夠讚。牧羊犬趕羊仔擘崎，讚甲講袂出話。
看彩虹小馬，有斑馬出場。我才想著哪會無人騎斑馬咧？原來是斑馬無聽人話，嘛袂行直線。大部份的動物攏聽無人話，遐少數願意佮人類做伙生活的動物才是奇蹟。