3尾兔仔3／9／25

素菜、拜師、寫小說毋免遐規矩

1素菜才是正港做菜。

煮肉輕輕鬆鬆就有一頓，好食閣營養的食譜真好揣。

食素閣愛食夠卵白質上難，素料加工品添加物佮油真濟，卵、豆腐、豆皮遮簡單的物仔，愛做甲食袂𤺪誠考驗人。素菜愛動頭殼自食材去設計變化。

欲做豆腐炒飯，冰櫥仔有一盒幼豆腐爾，這愛板豆腐較合。豆腐包布chiⁿ水試看覓，變豆腐泥，按呢炒飯傷澹，不如來做chhì-sì焗飯。

落bá-tah煎豆腐泥，豆製品落油煎過較芳較好食。那共卵兩粒硞破抐予勻。卵摻豆腐攪攪咧，炒卵綿綿若蟳仔膏，斟到盤仔莫傷熟。進前讀著有人用豆腐泥取代白醬。

青豆佮泡菜、蔥頭、thoo-má-tooh切幼幼，做伙炒甲焦芳才下飯，飯袂當炒傷久爛去無好食。了後貯到玻璃餐盒，鋪一層炒卵，chhì-sì囥上頂懸，入烘爐十分鐘， chhì-sì熔去，焗甲起 mái-iá反應（Maillard reaction）小可咖啡色，按呢上好食。

煮飯欲省力就一改做較大份，賰的冰起來抑是冷凍，明仔載中晝嘛有矣。

食素較緊枵是卵白質食無夠，若欲食甲夠閣有變化，比食肉閣較開錢嘛較厚工。我是盡量食素，卵佮肉揀有動物福利的買。

食肉簡單殺生罪惡，煮素菜麻煩毋過心安。

《熱帶魚》電影有一幕是主角劉志強規家伙仔咧食暗，看彼銀色的柑仔就足有古早味。《灶邊煮語》收錄的彼款傳統菜，親像阮阿媽兜咧食。這馬的少年人袂曉煮彼味，時行東洋西洋菜濫濫做伙煮，冰櫥有常在有韓國泡菜、chhì-sì，無台灣泡菜、鹹菜、高麗菜乾、菜脯。

2我細漢有去畫室學，國中彼陣看著美展海報，我佮先生講想欲報名，先生聽著隨變面，氣口歹凊凊。我畫甲哭出來，毋知畫圖有啥物意思，就按呢放棄畫圖這途。原來來參加美展是天大的挑戰，報名就愛著名，先生指導壓力足大。報美展愛開足濟時間提早準備，美術班學生咧拚的。

去茶館看師傅泡工夫茶，彼茶比家己泡的閣較燒，味閣較厚。聽人講茶氣茶氣，我聽攏無，閣予人笑連這嘛毋知。啉著師傅泡的茶，我才知泡茶有茶氣的真少，一般人的茶行到喙爾爾。茶入喙正經有氣衝去頭頂，閣落來燒烙腹肚。

師傅講學茶基礎班的學費就十幾萬，這錢無含茶具。做茶師愛開大錢，目標是做頭家，上好閣愛有家己的茶山，按呢茶米品質才掠會牢。我無資本厝內嘛無做茶，開大錢去學茶無效啦。佳哉寫作是無本生理，袂了錢嘛袂欠數。

我寫作無拜師，無人逼我愛照規矩寫，才通直直寫落去。

3去踅某一間冊店，有看著佮意的冊，店內放的音樂歹聽鑿耳，起毛䆀就無買。彼本冊就是三浦紫苑的《寫小說，不用太規矩》，有電子冊。三浦小說趣味，讀了閣有韻尾，強烈的情感，僫用理性去分析，寫作題材百百款，歡喜悲傷嚴肅通俗全全有，伊是我心中的天才作家。這本寫作指導冊用菜單形式，二十四齣菜好食閣好消化。內容袂輸是三浦親自講予我聽的。第十六齣菜開頭「Ho͘h——我正經無通好啥寫的！」伊自稱是感性的人，理性分享寫作撇步予逐家，有影苦著伊。講著的項目有空白、對話，幼路閣實際。目前這是我上佮意的寫作冊。