3尾兔仔3／8／25

823、骨頭攏知影、使女的故事

823、骨頭攏知影、使女的故事

1 有朋友問我8月23是啥物日子？

各位鄉親父老叔伯兄弟姊妹姨媽姑姐8月23就是「重啟核能公投」，請頓無同意。佗一个縣市同意上濟，核廢料就埋佇遐。

我足驚予人掠準我誠戇，新聞、大事代抑是基本常識，我攏會盡量去了解。聽著朋友按呢問，我不離仔意外，聽著知伊無咧看新聞。

2我性格誠拚勢，親像無按呢做就無資格閣活咧。

佮朋友討論家己寫作的工課攏會接，做甲氣身惱命嘛接，驚做甲無夠濟。伊問我按怎才會夠。我講：「得著Nobel文學獎才夠。」講了家己嘛感覺好笑。

拄讀了《我的骨頭知曉一切》作者Stephanie Foo比我閣較拚勢。伊會當無食無啉無睏拚命做（我枵人就sio͘h-to͘h），伊若無做就足空虛。後來伊去諮商，醫生診斷伊有複雜性創傷後壓力症候群（Complex PTSD），伊長期長時間予人苦毒。𪜶母愛伊完美做藉口，不時共伊蹔，𪜶爸母不時咧怨嘆若是無這个囡仔，無家庭束縛，𪜶人生會閣跤完美歡喜。𪜶共伊蹧躂到底，正常人會離開歹人，毋過Foo猶足細漢，伊顛倒掠準講攏是伊毋著，伊足驚爸母離開伊，閣較拍拚來予𪜶歡喜。落尾伊高中彼陣，𪜶爸母離緣各自建立新家庭，共伊擲挕捒。

檢采你無予厝內人苦毒甲遐慘，毋過你若是佮Foo仝款，細漢時驚予爸母擲掉，骨力做乖囝，按呢真推薦你讀這本冊。

Foo的阿母人無去，無共伊聯絡。Foo的阿爸共伊當做工具人，有困難就來揣伊，攏袂共伊關心。阿爸講欲自殺，伊就愛全力共安搭，逐改看著阿爸攏足忝足忝，後來決定結束親子關係。斷絕親子關係，人無一定過甲閣較好，毋過這是必要手段，這是伊整理有關資料了後所寫的，雖罔公開的資料真少。

熱天，予我想著進前大學歇熱，我轉來台灣，阮爸母嘛是無啥插我，𪜶一直攏按呢，𪜶離緣矣毋過這點是真成。阮母到今猶是毋知我留學創啥。我足討厭阮老爸無共伊聯絡共封鎖。毋過阮老爸有傳訊息予阮伴，叫伊愛我較骨力學英文。阮母嘛佮我講差不多的話。𪜶干焦會曉要求我，才無咧共我關心。

英文絕對愛會曉，我感覺學英文是義務，學日文佮台語就無仝，阮爸母予我足愛遮「無路用的」。

3大罷免了後，我閣共《使女的故事》抾轉來讀，讀比現實閣較慘的物仔，日子就較好接受啊。Margaret Atwood的描寫佮感官連結具體，親像若卵清的聲嗽，美妙。可惜《使女的故事》毋是幻想故事，是女人的歷史，今是伊斯蘭世界足濟所在的查某日常，阿富汗、沙烏地阿拉伯、伊朗、北非……。