3尾兔仔25／6／3
Lâ-giâ、薄荷糖、咱來讀讀
1 這陣黃酸仔雨，澹甲lâ-giâ攏ùi角落走出來。有時仔看烏影咧動，看予真是lâ-giâ啦，毋是目睭花花嘛毋是看著鬼。
以早室友飼柑仔色佮花豹紋貓仔，in兩个足愛bih灶跤掠ka-chōa，一喙就共欱loeh愛食甲。人看著閣共伊喙擘開早著袂赴矣。
今無彼兩食貓仔，厝內才有lâ-giâ來蹛。
公司嘛有看著lâ-giâ走出來，可能是天氣傷漚熱，in嘛擋袂牢欲出來通風。
2薄荷糖，我聽朋友講過這部電影，煞袂輸是兩个故事。伊講的薄荷糖，主角是查某，同學共伊欺負，害伊跳河死。十幾年了後辦同學會，死去的查某同學有一个好朋友欲來報冤。抑是我共兩部仝名的電影拂毋著去？
我看李滄東的《薄荷糖》，伊的作品，看了心肝頭慒。
現實時間無法度倒退行，影像通倒退放，火車倒退行轉去上初彼陣。這个手路共時間切幾仔段，結構整齊，欲予觀眾看予明。留白暗示做甲拄拄仔好，點一下就過去。
狗仔是重要信物，狗仔善良無辜忠誠，就準予人蹔嘛會走轉去主人身軀邊。狗仔是人類培養出來的物種。狗仔上幸福的日子，毋是咧野外自由自在，是佮人蹛做伙。主角的初戀情人嘛親像狗仔，伊到過身進前嘛真掛意主角。
主角猶佮某做伙彼陣，討厭狗仔踢狗仔，離緣了後假意講欲看狗仔去揣的前某，這款人上惡質。𪜶某看伊欺負狗仔講：「不如共狗仔刣死。」
凌遲比刣死閣較嚴重。主角共身軀邊的人凌遲甲真粗殘。伊嘛若像予家己的良心凌遲。伊若較早越頭行就袂行甲死路，伊無法度佯毋知去過快活日子，愈行愈毋著去。有足濟人講細漢時飼兔仔的鬼故事，無足愛兔仔嘛無去學按怎飼，落欲就凌遲甲死矣。
𪜶某是虔誠的基督教徒，做愛進前愛祈禱上帝赦免，道德約束敢若足重，伊煞討客兄，予人足衝擊。有人講查某愛假戇查埔才會愛，感覺伊真古錐。𪜶某若有佮意的人，就叫人教伊物仔。伊叫主角教伊騎鐵馬，那騎那驚甲ki-ki叫，袂輸咧哼。客兄教伊駛車仔，嘛是那駛那叫。
主角上悲慘佮上天真彼陣攏咧哭。
伊攑銃哮講欲自殺順紲刣死害伊遮慘的人，想想咧毋知是佗一个害伊上重。
少年時伊敏感閉思，看花看甲目屎含目墘。
電影內自然景緻青lèng-lèng，薄荷糖白蔥蔥，看著足媠，毋過人悲傷甲。
3我chín愛聽王秀容的聲音，伊講台語咬甲足正，聽著人舒適。教典音檔點來聽，聽袂𤺪。伊上公視台語台節目笑微微好笑神，予人愈看愈佮意。
《咱來讀讀》有收教育部台語電子報的專欄，佮全國語文競賽「閩南語朗讀」的文章。教育部台語電子報論正經袂䆀看。
愛一篇一篇揣王秀容的作品真費氣，佳哉有這本冊。
王秀容頭一本散文《我咧唱歌》，頭前講囡仔時不離仔趣味，到後來中年學校行政彼葩小可仔囉嗦。筆法樸實，讀著真成日記。
《咱來讀讀》逐篇文章電子報限制800字，伊寫甲精彩鋪排媠。我真推薦《咱來讀讀》，真適合做接觸台語文學的頭一本冊。讀伊正港美妙的台文散文，讀著足享受的！