3尾兔仔25／3／23（晏）

食頭路

1漫畫市仔散工，排擔仔賣冊。有一个同事人生甲足媠閣瘦抽。伊定穿全烏來上班真Pro的款，歌劇院、美術館的人員嘛穿甲烏mi-mā。伊全身穿仝一色，衫仔版形特殊有層次，配甲予人印象真深。

伊學西洋畫，以早展覽做工作人員愛穿全烏，thàng-sù有足濟烏衫，按怎配都通四配。媠查某呵咾我穿衫媠閣有特色，聽著蓋歡喜。

2食頭路這層代誌，敢是用浪費性命來換活命？

頭路是共別人做穡，天職是為著家己來做。做工課服務別人，有時仔聽著人好禮仔說多謝，有人需要家己的感覺真好。固定逐工來圖書館的讀者，有三分一的讀者有路無厝。另外三分二是老大人。圖書館袂輸是收容所，毋管是啥物款的人攏會當來。有路無厝的人，通常袂來煩館員。有一寡老歲仔人，定來揣館員講電腦歹去，見擺去共看都無代誌。後來我才知，𪜶是誠寂寞欲揣人開講，毋是正經有啥物問題愛咱解決。

3《摸布欲家己趁食》（摸布想自己賺罐罐），讀著足改鬱，提醒阮食頭路的正面意義。《島耕作》系列我是讀甲真忝，做工課著愛拚甲按呢？我認為寫著演歌歌手八之橋新子這篇上蓋好看，蠟燭燒甲尾火猶真猛。我真佮意美空雲雀的歌。