1我做小工的公司，逐家都叫我台語小老師。頂司問我iap-ai啥物意思，in母講：「彼个人真iap-ai。」我毋捌聽過，同事嘛無人知影，我掀字典揣著，iap-ai漢字寫做揜哀，蕭平治《台灣俗語鹹酸甜》第三冊，解說是「內心暗暗á悲哀。」我足愛讀蕭平治老師的文章，真米正酵的台灣話。
對現此時教育體制佮政治，中華民國寄生台灣，用中文殖民臺灣人，我是感覺真悲哀，閣真濟人無發現語言毋但是講出來的話，語言是咱的靈魂佮認同，講台灣話就是自由的感覺。中華民國害咱成做中國領土的一部份，拜五中國修訂《國防動員法》，若領土分裂會出兵，徵收私人財產。
同事看我一下仔就揣出iap-ai的意思，伊真欣羨，問我按怎掀台語字典，我共一個禮拜學好台羅拼音！貼予伊。有朋友佮我台語開講幾若年了後，伊去參加台語活動，學台文寫光批予我。我袂iap-ai，親像韶大崙的音樂節目《大倫有大量》開場：「我相信總有一工，講台語嘛會通！」
2我佮意花，毋甘看媠媠的花蔫去臭去。我愛買有花草的物仔，看著花人就歡喜。春仔花永遠鮮沢美麗，我chín想欲學，別項手工藝傷難，這項我會曉閣佮意，拄好老師來台中開課。春仔花這號手藝chín好做，chín好學，有耐心就做會好。材料是生活中的物仔，紙枋、鐵線佮文化線通組出無限種花。
老師六十捅歲，伊上課講足驚人聽無台語，上課一半中文，一半台語。悲哀喔，佇台灣講台灣話閣愛驚人聽無。
老師講這馬有人亂教，結婚彼工查某彼爿春仔花掛粉色，查埔掛紅色，粉色以早人講是oa̍h-kiok活腳色傷活潑，紅色才大範，古早查埔查某都掛紅色春仔花。
纏線手掠無好會捲蔫，線對紙片liu去。捲蔫意思是枯乾蔫去、捲起來。葉仔捲蔫。鰇魚烘甲捲蔫。張日東的《載滿思念的竹葉仔船》中〈年仔節仔的食食〉作者寫伊烘的烏魚子，食著喙舌會捲蔫，好食甲頭毛都會掣掣--起來。宜蘭腔講kúiⁿ-lian。
學工藝毋但學手按怎做，老師講的話嘛真重要。台灣台語工藝庫有收纏花的詞，資料來源是人間國寶陳惠美，伊出版《春仔花細工 : 傳遞祝福的纏花手作》有中英對照，就欠台灣話，台語工藝庫共補起來。
頭一堂課做官帽，這種花我有看過毋知這是啥，干焦春仔花才有的花。
3 九月梓冊房有冊店內的手製繪本展，通讀著上新猶未出版的作品。陳冠伶的《當風經過的時候》用線條共看袂著、抽象的感覺畫出來，讀著四序閣心適。儲玉玲的《愛睏》，色水佮氛圍誠放鬆，睏前讀囡仔冊予囡仔緊睏，這本有路用。黃郁欽的《台語予魚仔食去矣》，黃的作品定咧反思人權、霸權，情節簡單真好明白又閣有深度。故事開頭偉大的人來到島上，乞食趕廟公，遮爾簡單的道理煞有真濟人看袂透。吉村竹彥的作品，我掠無頭摠，怪甲袂講得，猶是佮意讀。逐年我攏足期待這个展，繪本若像囡仔，啥物攏有可能。
