1洪淑昭翻譯珍．阿斯頓的《傲慢佮偏見》先出好讀版11萬字，了後出全譯版18萬字，我先共好讀版有聲冊聽了。這若改做歌仔戲，穩當足好看。《傲慢佮偏見》若像劇本，人物對話鋪排故事，明瞭好理解，不時讀著金句，予人想欲頓桌仔贊聲。配音員講了誠紲拍，家己嘛親像跋落去冊中世界，綴斑家經歷大細項代誌。無心情讀好讀版，讀了若無讀完，等到完整譯本出來，我才想欲讀。
《傲慢佮偏見》咧講幸福的婚姻佮家庭到底是啥物？若像英國版本的《親情莫計較》，配上洪淑昭一粒一的台語翻譯，讀著若像身軀邊阿伯阿姆好朋友的故事。《傲慢佮偏見》是足純的愛情劇，愛會當克服階級、門戶。有人為愛蹽落去，有人為錢結婚。幸福敢會當用錢買？我聽過有查某就因為爸母揣算命仙算，講嫁這个人這世人食穿攏毋免煩惱，伊choa̋n嫁矣，兩人無四配看著對方就慼，今伊猶是愛為著食穿煩惱。作者用莉絲佮謝露提做對比，莉絲大膽拒絕嫁予好額人，謝露提委屈嫁予一箍癮頭。In本底是姊妹仔伴，莉絲看袂起謝露提的決定，謝露提in翁閣會當繼承斑家所有的財產，好朋友相準家己的家伙，有影是講著錢傷感情，兩人的感情無以早遐好。
「俐絲，任何代誌攏會當凊彩，毋過，無愛情的婚姻你就千萬毋通結呢！你有影對伊有這款感情的，敢是？」第59章中大姊珍對俐絲講。若講著愛，這是世間上大的奇蹟，愛是袂焦去的湧泉，包容兩人無仝的所在，創作熱情佮幸福。啊，婚姻若干焦賰責任無愛情正經是無法度過，緊縒慢拆破面。
好讀版有聲冊：https://moo.im/a/3nDPXY
2《盜墓奇美拉》（La chimera）重映！
Alice Rohrwacher的作品本質是勸世，大力批評資本社會佮父權，關心婦女、散食人佮難民、移民。《盜》的背景設定是美麗庄頭，海墘仔起發電廠，海水有毒，塗底無肥，罕得有演唱會予逐家娛樂，閣愛感謝發電廠贊助。遮爾tēng的核心，煞用奇幻的劇情來表達。做歹代誌無好尾，盜墓台灣話講劫棺kiap-koan。蔡俊明老師講劫棺閣有一个意思，赤跤穢著足lap-sap，定定是咧罵囡仔講你這个劫棺的，跤緊洗洗咧。阿圖生成有感應，知影佗位有墓仔埔埋寶物，伊感應著的時天地顛倒反，若親像死人的世界共伊吸牢咧。阿圖四界揣墓仔埔，鞋仔chín lap-sap，伊予古物買家剾洗伊彼雙鞋仔，做賊仔跤手攏無清氣。劫棺的做粗重閣走予警察逐，古物買家做輕可閣趁名聲，趁甲油洗洗。
電影中有兩葩若像唸歌，那唸那唱阿圖的故事，歌詞誠白話，歌聲響起魔幻氛圍。阿圖知影劫棺毋好，伊猶是繼續做，伊有別條路通行煞干干仔欲做這途。阿圖劫棺料算是趁袂少，伊煞蹛佇城門邊仔亞鉛鉼厝，食穿真簡單，可能蹛佇墓仔埔比彼破厝閣較四序，上無風袂灌入去。我想阿圖真心愛古物才繼續劫棺，伊這个人純然甲，別項to無咧想。想欲點播《玉仔的心》予阿圖。
電影開頭咱知影阿圖劫棺予掠去籠仔內，拄放出來。伊的愛人Beniamina無去，咱毋知Beniamina按怎無去按怎死。阿圖夢著Beniamina，伊的裙裾尾予某乜勾著，紅色膨紗抽袂出來，埋佇黃塗中，指引伊向下跤揣。綴劇情來到尾，我咧臆，有一改劫棺崩去Beniamina予埋佇內底，干焦阿圖欲共救其他人全走了了，劇中劫棺集團的人攏毋敢講著Beniamina。劫棺的結局就是較早軁入去棺柴，愛情美化劫棺這失德代。Alice Rohrwacher的作品媠甲袂講得，伊控訴的不公不義，袂當假做無看著，魔幻的花對現實的針生出來。
3踅菜市仔，今菜價較懸，一把40箍，佮有機菜平貴。阮母教我菜價懸，顛倒愛買貴的菜，彼種菜本底就貴，菜價起的時價數嘛袂起，風颱了後阮母定定買香菇來炒肉絲。我買一把蘆筍，頭家講足幼的手拗就斷。外國蘆筍比手指較粗，愛提剾仔削，蘆筍粗的所在攏晡袂落去。原來蘆筍愛食幼的，免削炒一下就起來青甜好食，想著彼菜價，高貴的滋味。