1一般人對歌仔戲的印象是娛樂，奢颺，大團圓。窮劇場的《紅梅虎度》佮咱所想的歌仔戲全無仝，這是存在主義式的歌仔戲，兩个查某演員做對照，分袂清siáng是影，siáng是主體。融合台灣話佮粵語，粵劇的曲台語唱，七字仔用粵語唱，這兩種話做伙唱，好聽閣袂跳針。
坐佇劇場等戲開始，想著早時佇屯屯tūn-tūn Books & Booze，讀著in的Khí-sū文化出版ê《創傷是一場時空旅行》，我想從到今查某受著上大的壓迫，總講一句就是：「伊無無法度做家己。」SydneySie寫伊細漢老爸會拍伊，伊為著莫予老爸受氣，衫仔、喘氣偌長攏著愛注意，老爸猶是共伊拍甲叫毋敢。窮實毋是伊做毋著，老爸拍伊管伊來，逼伊完全順從老爸。性別的根本問題是權力。
《紅梅虎度》改編自經典《再世紅梅記》。《再世》咧講賈官的小妾李慧娘，伊佇西湖拄著書生裴禹，呵咾少年生甲真緣投，賈官聽著怨妒共李慧娘刣死。裴禹拄著盧昭容，佮李慧娘生甲仝款仝款。賈官欲強娶盧昭容做細姨，裴禹欲共救煞予賈官軟禁。李慧娘這个女鬼救in脫離賈官。附身了後盧昭容破病欲死矣，李慧娘借屍還魂，傳統戲劇的歡喜大團圓。這是線性時間。《紅》是對裴禹予賈官軟禁開始，發現棺柴了後倒頭想，唌觀眾看落去，規齣戲攏無冷場，自頭到尾看甲足專心。愈看愈不安，女鬼佮活人談戀愛，迒過生死界線，借屍還魂敢有遐順利？咱的靈魂佮身軀獨一無二。《鋼之鍊金術師》講過人的靈魂干焦會當轉去家己身軀，其他身軀佮咱的靈魂無四配。
通常是仝一个小旦演李慧娘佮盧昭容。《紅梅虎度》有三个演員，李佩穎演書生裴禹，袁學慧演小妾李慧娘，李尉慈演盧昭容aka徛壁跤、無人愛的、其他（？）。李佮袁是戲曲演員，in穿古裝，李尉慈演現代嘛演戲曲，伊穿殕色短䘼闊褲，現代衫仔，一張面素素無畫妝，親像是現代人穿越到古裝劇。李尉慈的角色設定在傳統歌仔戲來講真前衛。
開場李尉慈佮袁學慧，坐佇舞台兩爿對看，若像人照鏡。李慧娘是女鬼，照理來講是影，毋過愛情劇中女主角上大，顛倒盧昭容這个人成做伊的倒影。裴禹看盧昭容的時心肝內想的全是李慧娘，伊看袂著盧昭容。伊咧佮昭容講話，袁學慧徛佇李尉慈頭前，袁學慧是主體，李尉慈綴伊做動作。昭容活腳，慧娘恬靜，性格全無仝。袁學慧穿短䘼真活潑，手骨予人看現現。生目睭發目眉毋捌佇台頂看過小旦的手。李尉慈無啥物台詞，若講話就是做慧娘的合聲。
李尉慈徛佇舞台頂，毋過電火炤佇李慧娘身軀，觀眾主要是咧看男女主角談戀愛，有時仔感覺李尉慈才是彼个看袂著的鬼。書生佮女鬼當咧糖甘蜜甜，李尉慈徛壁角閣穿一軀無仝時代的衫，礙虐礙虐敢若怪怪。刁工設計加出來的角色，親像《犀利人妻》講：「無人愛的才是感情中的第三者。」裴禹佮李慧娘頭一改見面，慧娘欲予裴禹葵扇，李尉慈徛in中央，慧娘先予李尉慈葵扇，李尉慈鬥相共提葵扇予裴禹，彼幕李尉慈若像查某𡢃。李尉慈嘛親像觀眾，咱嘛在場，演員假做看袂著咱，全心搬戲。
戲開場李尉慈搬伊咧讀冊，讀一本看袂著的冊，手那掀袂輸有一本冊，伊讀ang、áng、àng、âng、āng，聲調練習，親像人拄學台灣話，âng嘛是紅梅的紅，伊讀紅梅記來開場。字幕siāng時出現一逝台詞，觀眾讀著，毋過演員無唸出來，照理來講字幕愛照演員所講的話，這時字幕比演員講的話大。咱若攏用字幕來理解傳統戲劇，咱看歌仔戲若像看一齣外國話的電影，對家己文化的歌仔戲無一屑仔留戀佮親密。
古早看歌仔戲毋免字幕，聽無演員咧唱啥觀眾嘛看甲興𩑾𩑾。現代劇場有螢幕顯示字幕，為著予聽無台語的觀眾會當看有。總共有三逝字幕演員無唸出來，出現佇開場、中場、煞場。煞戲了後有Q&A，編劇兼演員袁學慧佮導演高俊耀坐佇台前，我用台語問：「是按怎有三逝字幕演員無唸出來？」導演講伊聽無台語，這無聲字幕是伊設計的。歌仔戲導演聽無台語！台語表演化到這款坎站啊！？袂曉台灣話閣會當導歌仔戲，台灣奇觀。後來我用中文解說我的問題。伊的意思大約是講，這三逝字幕是現代劇的結構，分段的作用。無聲字幕佮袂曉台灣話的歌仔戲導演嘛是這齣戲真前衛的所在。佇遮呼叫高導演去學一下台灣話，明明這無聲字幕設計甲遮好，歌仔戲導演袂曉台灣話講袂過去。
咱若想著小旦，攏會想講生甲誠媠。歌仔戲袂講會使，予人想著屎to無媠啊。 《紅》中的小旦是女鬼，穿紅衫，躡跤尾倒退攄，裙裾尾拖甲長長看袂著跤。毋是咱所想的溫純古錐的小旦，不止仔豔麗。文武場鑼鼓演奏出怪異氣氛，親像鬼片配樂，假鬼假怪驚死人。慧娘為著欲救昭容、裴禹，附身昭容假痟，賈官毋敢娶痟查某，in choa̋n得救。慧娘起痟，用粵語唸神經病特別好笑，想著周星馳電影。毋捌看過小旦遐爾笑詼。咱知影有名的歌仔戲的演員演小生較濟，《紅》中的小旦比小生閣較重要。改變咱對小旦的印象，小旦毋但生甲媠媠，閣有足濟創新戲路。
《紅梅虎度》的虎度意思毋是有虎，是咧講粵劇術語進出舞台的門。《紅》的舞台設計單純，虎度門的所在chhāi屏風，演員出入親像去到屏風後壁換衫，若猶佇咧台頂。柴頭桌仔，金交椅佮現代的鐵椅仔。昭容裝痟的共鐵椅仔捒予倒，人的理智倒去就是神經病，到Q&A彼椅仔猶倒佇塗跤。道具嘛真少，遏紅梅枝定情緣，咱看袂著紅梅，對演員的動作表情去想像有梅花。慧娘賣身做小妾，在世袂當家己做主，做鬼才有自由。毋過人佮鬼袂當做伙。若有閣活的機會，啥人甘願放手？若通閣活一擺毋知偌好咧。若欲做人代價是一世人袂當有家己的名，假做昭容。人敢有法度假做別人過日子？人照鏡看著家己，面對家己咱袂當講白賊，無to有影會起痟。希臘神話奧菲斯𤆬尤麗狄絲離開地府，欲予愛人閣活，強欲𬦰到人間，伊越頭一下看生離死別。人註死無註生。昭容這个角色徛壁角無人掛意，連身軀嘛欲予鬼搶去，到今咱總算看著昭容。煞戲彼陣台頂干焦李尉慈，伊手頭有真實的紅梅。劇中賈官講查某若衫仔。衫仔隨人穿，毋通有意見。賈官講妾不忠處死。小妾微小無卑賤允：「君不忠應當如何？」咱毋但看著愛情，彼紅梅嘛是查某人的自我當咧大開。字幕寫入聲、入身、入世，入聲是無聲的聲音，喙愛做彼號形袂當送氣，親像欲哭無目屎，悲傷到地。慧娘佮昭君毋管生甲偌爾仔相𫝛，逐个人攏是獨立的性命。
2春仔花傳統有12枝花，我頂禮拜拚命做梅花，梅花有2蕊，葉仔一對。做春仔花chín開時間，我拄學閣誠頇顢，纏好5个紙片，2點鐘過去。組合花葉線無纏好鬆去，重做幾若改，欲送人愛做較媠的。《紅梅虎度》煞場了後，我佮朋友徛佇劇場外口等學慧，邊仔閣有一陣人咧等佩穎。小旦食雞腿，戲箱食涼水。我本底學春仔花是看媠niā-niā，做春仔花送佮意的歌仔戲演員，學這chín有路用。送物仔予學慧我感覺足幸福的～
3阮翁生日去海線耍。三井outlet無好踅人𤲍𤲍𤲍。邊仔的街仔尾冊店有夠讚，改造舊厝做冊店，有足濟地方創生的冊，嘛有台語詩集。掀《餃子寶島》，台中有名的水餃店食過一半較濟。佮頭家講話chín投機。來梧棲著愛來街仔尾坐坐咧，彼間就chín好看啊
。