3尾兔仔26／8／23

敲油、鞭刑、終戰彼一工

1志工是無錢嘛甘願做的工課，敲油是愛付錢煞無欲付的工課。

Hōng敲油感覺真ak-chak，以後若拄著無熟的人共我討物件問代誌，看著「無錢」就應該隨拒絕，一句都莫應，服務佮勞動攏愛收費。

無收錢人掠準講這工夫、智識、創作全無值錢，軟塗深掘。無錢的工課毋是機會，彼叫做敲油，重複佮家己講3擺。做白了工的工課，不如佮Pong耍。逐工共Pong--ê款待甲四序四序我甘願。

2聽著序大支持鞭刑，講親像新加坡按呢上好。我聽一下氣甲頭殼衝煙。新加坡是啥物款的國家？推薦讀韓俐穎的《我所認識的新加坡：一位在地記者的參與及觀察》https://moo.im/a/9ewAQT。

無疑悟，鞭刑有人支持。鞭刑了後欲共犯人治無，治療用著健保醫療資源，無治放予爛衛生歹處理，欲治毋治攏無妥當。鞭刑敢有予人驚甲毋敢犯罪？今有死刑，人都毋驚死囉。鞭刑有影夯枷，歹做兼浪費社會資源。

正常人知影愛守法，刁工做非法的代誌有夠戇。讀胡慕情的《一位女性殺人犯的素描：她如何謀弒母親、婆婆與丈夫》https://moo.im/a/5cewAU，原來犯人佮我想的無仝，in無法度思考做歹代誌的後果，大腦發展敢若無到分，in咧坐獄煞毋知欲悔改，毋知家己傷害著別人。若人是因為失能犯罪，咱著愛重新思考按怎防範犯罪，予in莫行甲這步。

3去電影院看《終戰彼一工》，這部紀錄片關係著台灣人認同，二戰佮日本殖民，閣有中華民國的內部殖民。6位受訪者清楚講出：「雄雄對日本人成做中國人。」

紀錄片開頭是原子彈，彭敏明用台灣話講：「一下爍！一下磅！」日本戰敗放棄殖民地，日本選擇放袂記帝國佮戰敗歷史，袂記哩台灣。台灣明明有參與日本侵略，中華民國煞改變咱的歷史，予咱另外一个版本。咱台灣親像成做戰勝國，論真比戰敗國閣較慘，咱無家己的國，予中華民國拆食落腹，今閣有中共威脅。

這是一个無聲的故事，親像咱的母語，袂當講。紀錄片中這句用中文講，母語確實無聲去。

紀錄片中有足濟過去的新聞影像，一大堆人倒佇塗跤袂振袂動，屍體濟甲算袂清。

歷史共咱講甲真明矣，咱台灣若繼續做人細漢的，講別人的話，綴別人姓，萬劫不復！