3尾兔仔26／8／13

桃仔、香檳、夢露

1暗時電影看了，轉去經過公園，遐停一台發財仔，枋仔寫「拉拉山水蜜桃」。某頭家看著我倚來，齒戳隨㧣過來請我食看覓，對上大粒食到上細粒，3、4種大細，食著都幼膩甜蜜蜜。我看過這台發財仔幾若擺，頭家講伊踮這搭賣十幾年。我揀一粒中的桃仔，秤重230箍，殘殘買落來。

逐粒桃仔攏有包泡棉保護，我共遛落來，細膩橐入去麻索仔編的袋仔，頭家講愛注意毋通靠著。客廳囥2工等桃仔熟，囥入冰櫥仔嘛有微微仔桃仔芳。

2金馬經典佇台中，今年主題是Billy Wilder，伊導的愛情電影定定有香檳，《七年之癢》、《熱情如火》、《愛瑪姑娘》、《龍鳳配》這幾齣都有。《日落大道》嘛有香檳，老查某單戀嘛是一種愛情。袂輸男女約會著愛啉香檳，無別項好做。毋但啉香檳，《七年之癢》閣教觀眾按怎用大頭拇共香檳特殊的草窒仔拍開。伊的電影看一下就知上升佇處女座，幾若个電影男主角厚操煩又閣不時慒心。人咧煩惱就胃慒慒，果然是月娘蟳仔。

3歹命人定定靠著食苦，好命人才予保護甲好好，純然天真。《上流社會》講人好額才善良，應該是人好額才「有可能」天真。

夢露美妙甲無得比，天真性感，伊人間世事捌透透，純情少女閣搬甲袂輸真的。電影中的夢露，若像一粒桃仔，熟甲拄拄仔好。仝款的代誌別人做就癩ko，夢露做就是古錐。我無法度講連家己嘛無信的話，夢露做會到，閣予人叫是伊生成就按呢。

《七年之癢》中夢露馬鈴薯片搵香檳，誠成美國人會做的代誌。電影設定佇熱人時，夢露蹛樓頂熱甲擋袂牢，樓跤厝邊有冷氣。樓頂佮樓跤本底是一戶，厝主用柴枋共樓梯隔開。樓梯無通樓頂無通任何所在，夢露講這樓梯誠優雅！無效的物仔就是優雅。

地下鐵向前去風吹過來，夢露徛佇通風口吹風，不離仔合理。Billy Wilder共一寡奇奇怪怪的代誌，解說甲足有道理，狡怪甲予人佩服。

夢露的代表色，百面是桃仔色！《紳士愛美人》中的桃色禮服。《熱情如火》中璇石手指無夠看，伊掛璇石手鍊！大明星若像璇石光爍爍，毋管是真的璇石抑是假的璇石，鑿目甲目睭擘袂開，咱干焦會記咧夢露上媠的時陣。