3尾兔仔26／7／23
貺大餅、台語家庭、日頭雨截句
1今年七月初七佮阮伴做伙十冬貼貼，時間hóaⁿ一下to過去。
參加台中台灣話讀冊會，𤆬咱讀冊的賴老師是基督徒誠gâu唱歌，有冊友是牧師，in聽著我欲結婚chín歡喜，結婚彼工相招去中興湖共我唱歌慶祝。拄好《台文通訊》鄭良光先生轉來台灣，牧師嘛招伊來。阮母佮大家大官嘛有來，逐家歡歡喜喜唱台灣話聖歌。賴老師送的紅包有白話字祝福。簡單閣美滿的台灣話結婚儀式～
彰化台語園區請黃瑪莉老師教春仔花，我共買頭插。老師講新娘愛雙雙對對，愛2蕊花結做伙，揀五福花佮牡丹。登記彼工我頭鬃插春仔花，穿白色麻仔洋裝有玫瑰色刺花。無買新娘衫，揀一領平常時通穿閣有氣氛的衫仔。
結婚書約家己設計，翻譯做台文（翻譯參照阿華師）。政府應當共所有法律條文翻譯做本土語，原住民語、客話、台文攏愛有，保重逐家語言人權，毋是全部的人中文攏足好，避免語言的誤解，以人民無義為主，這才是真正的語言平等。法律干焦中文，這絕對是霸權。
台文結婚書約 歡迎使用
人客送主人是送禮，主人送人客是貺（hēng）。我細漢食著紅帽仔toc hín佮意，紅帽仔予人懷念。喜餅卡片欲寫啥我想幾若工，餅送到位彼工下晡，散工坐o͘-tó͘-bái轉去，等青紅燈彼陣想著：「祝福食餅甜甜蜜蜜，逐工平安歡歡喜喜。」8字鬥一句聽講是台灣話特色，雖罔無寫甲偌媠，誠意滿滿啦。
2今年台語家庭舉辦「拚台語」展覽，北中南巡迴，我去做台中場導覽，紹介台灣話基礎智識，腔口佮聲調、台文冊。這活動有食閣有掠，禮物豐沛，加入台語家庭組隊to有送台語家庭尪仔，這隻尪仔無名，毋過足濟人愛甲，現場人𤲍𤲍𤲍。無咧講台灣話的人嘛予尪仔唌著走過來排隊，台中場人數上無有臺北場2倍以上，毋知紲落來高雄場偌鬧熱？
踅展覽毋但送禮，閣有安排足讚的台語講座，可比講這改洪惟仁來講台語腔口，語言學的冊我家己讀讀無啥有。咱台灣話特色是毋成彰毋成泉，我宜蘭人講老彰腔，想講佮泉腔無底代。人講宜蘭腔suiⁿ-suiⁿ núi-núi，彼uiⁿ的音原來是去予泉腔𪐞著，宜蘭人講95%彰腔佮5%泉腔。
文化部推動台語家庭3年。足罕得聽著台灣話朋友有去申請，我早著聽過台語台報導，貧惰去了解，彼獎金嘛無蓋濟，敢若chín費氣。我本底to足關心台灣話，免這台語家庭，我嘛是咧做相仝的代誌。
後來我有接著台語家庭相關的工課，才去申請，今申請過程誠簡單，干焦想密碼上難。台語家庭的目的是鼓勵逐家講台灣話，參加台灣話文化活動佮講座。
台語家庭是咱台語人對政府表態的好機會，咱有遮濟人口講台灣話，參加台語活動，向望友志相佮來申請，骨力參加台灣話活動。
3揣閬縫讀詩拄拄仔好，一首短短仔，袂讀甲入迷公車走去，抑是袂記落車。
王羅密多的《日頭雨截句》誠合這馬天氣，風颱了後猶有外圍環流，台中落日頭雨閣出虹。對王羅密多這个筆名to知伊人狡怪，伊的文章讀著足自由。有一句話講：「鳥仔生成會飛；人生成會行路。」我想欲接王羅密多生成會寫。
恭喜恭喜！！！