3尾兔仔26／6／3
台文通訊BONG報、麻穎牛奶茶、先知台文版
1以早讀BONG報，論真講毋是讀心適，是欲讀台文。去Match cafe看著5月BONG報，冊皮就足唌人，排版有較媠，內容嘛比5冬前趣味、倚近生活。
我足佮意讀張瀠文的食譜，伊蹛佇芬蘭。伊5月分享struvor滴粿，佮甜粿足成。芬蘭五月初一Vappu是大節，慶祝勞動節嘛是佮告別寒天。愛啉Sima芬蘭檸檬汽水酒配滴粿。洪明道的專欄【是按怎án-ne生】，寫故事來教科學，淺白閣好看。林麗能〈厝跤ê鳥仔〉咧寫市內四常看著的鳥仔，予我想著蕭平治的《還我台灣鳥仔名》，台灣話講自然我真愛讀，親像咧學地海的真名。陳育萱的〈語言是傳統戲曲ê靈魂〉，講甲真對點，傳統戲劇做囡仔戲改講中文，這是豬頭毋過去顧鴨卵，害咱人話滅亡。台文通訊BONG報愈來愈好看，有評論嘛有趣味代，薄薄一本方便隨身紮隨時讀，嘛有網頁通看，誠適合予人熟似台文。上新的台灣話議題、戲劇、冊全攏有，正經有夠讚。
2 逐年熱天都愛啉一杯Match cafe的麻穎牛奶茶。就親像冬節愛食圓仔。
3紀柏論上gâu寫述情詩，比喻美妙，洗盪心靈。《先知》(台文版)逐篇詩開頭攏是有人問先知一个問題，請伊來開破。這馬較少人知影開破這个詞，若毋知開破，毋就執迷不悟慘囉。開破這兩个動詞敆做伙誠有力量，開破了後就欲悟道。我讀過中文版先知，閣來讀先知台文版，台文版譯甲閣較好。西方的哲理讀著生份，譯者蔡緯賢譯甲不止仔在地，親像「有人講甲規畚箕，做無一湯匙」、「彼枝用來安搭你靈魂的月琴。」予人閣較好理解《先知》的道理。
sió-khóa kiàn-gī :
hoan-e̍k nā beh iōng chi̍t jī piáu-ta̍t,
iōng “e̍k” pí “hoan” khah ū thoân-ta̍t tio̍h ì-sù,
“hoan” thiaⁿ--khiài to̍h kan-na péng lâi péng khì--ê ì-sù niâ--ah