3尾兔仔26／4／23
開花結子、Pong--ê剃毛、憑據
1頭拄仔讀台文小說，我彼陣台灣話猶無夠好，藍春瑞老師的作品讀無啥有，袂曉欣賞四句聯仔。今讀《開花結子》，佩服到地，凊彩攏有鬥句「頭家老bóng老，閣真有擋頭」，這台灣話媠甲無地比。
萬事萬物講台灣話，談戀愛房間內當然嘛是，推薦逐家欲「弄被風」，做彼「天地所設ê好戲」，《開花結子》捒來讀，那念氣氛那好，做前戲拄拄好。冊內齣頭百百款。開花毋就是欲受精，原來冊名是這个意思！報逐家頁數：27、114，毋但𣻸𣻸，有影重鹹--ioh !
2二十四節氣5月初5立夏才算熱天，4月初溫度佮熱人差不多。二九暝就聽著石ki-á吱吱叫咧揣伴，今年正經熱。Pong--ê熱甲𤺪𤺪，𤆬伊去剃毛，精神好草加食袂少。聽人講餐巾紙桶窒草就是𨑨迌物，我做予Pong--ê，伊愛耍甲反去。兔仔剃毛勼水一半W
3有一寡人足要意教育部台語漢字有啥毋憑據？憢疑教育部台語亂寫。（教典網頁有說明原則佮委員會人員名單，有興趣通去看）在我來看用佗一个漢字攏會使，台語標準化閣較重要。敢有人去憢疑中文是憑啥按呢寫？中文毋是自倉頡造字彼陣就定落來謼。彼種堅持家己的寫法上著--ê，是咧共台灣話創亂，請莫閣鬥無閒。漢字遮濟字毋知佗一字正確，規氣來寫白話字啦。