3尾兔仔26／4／13

人間失格（台語）、有美夢上媠、梅仔餅、為了與你慢步宇宙、起頭閱讀、hōng請

1逐家看廢人無，想著刺鑿甲。人間失格的阿葉煞確實做毋著，煞毋知欲按怎講伊。

有一款人猶未做就放棄，跤步踏差一改，失志跳落萬丈深坑。聽講這款人愈來愈濟，別人欲共伊鬥相共閣揣無人，毋知是覕起來抑是轉去矣。

鱷魚手記佮人間失格有幾若點相仝，手記格式，性格痟狂，驚惶幸福，軟汫鬱悶。鱷魚袚人皮，失去做人的資格。

人間失格中有一个遊戲，共詞分做悲劇佮喜劇，世間大部份的詞是悲劇，少數的喜劇，予人毋知欲笑抑是哭。

隔十年閣讀一改人間失格，台語版氣口誠無仝，譯文順甲若像本成就是台灣話寫的。

是講兔仔共我的人間失格食甲冊皮抾捔，chín人間失格。

2逐工聽阿真的《有美夢上媠》，阿真講伊做電音，向望媽祖進香通放伊的歌，三太子綴咧跳。〈情歌〉親像南無觀世音菩薩遐慈悲。

3去師大演講，Tâigael：祖傳語言與跨文化的翻譯與對話 翻譯與創意書寫工作坊，chín多謝學員報名來參加。我的主題是台語翻譯，用地海太古語來講母語。現場有奇幻小說愛好者，我毋敢講家己讀偌深，奇幻小說有影心適，讀甲誠歡喜。攢梅仔餅送予逐家食，請你食酸酸酸，予你台語講甲真輾轉。台灣話正經是魔法嘛是祝福。

4《為了與你慢步宇宙》出甲第四集。逐家通知的道理，號做「社會常識」，後來我才知影家己真欠缺這款智識，若是有人共常識拆分明寫做一本冊毋知偌好。漫話的主角是竹雞仔小林佮自閉症宇野，兩人成做好朋友，做伙進步解決生活困難。有人講現代囡仔毋知禮數，毋是in無欲學，是無人用in聽有的方式教。讀了溫暖閣予人智慧。

5有人問我「按怎起頭閱讀？」我足細漢就會曉提冊來讀，無人鼓勵嘛無人共我逼。無意中就慣勢讀冊，若硬欲講原因，無人佮我做伴誠無聊，只好去讀冊，愈讀愈有興趣。《十月堂舊書事》畫愛買冊的人客都閉思閉思的款。

6張亦絢來台中演講，我去聽學著真濟物件，閣予伊請，歡喜到地！