3尾兔仔26／3／13

福氣啦、無情的火車、舊物仔

1足濟宗教聚會攏有信徒分享的葩，共人講信教了後，我身體健康趁大錢，原本偌慘拄偌慘佛祖予我度過難關，總共一句就是：「信這个教有夠讚，逐家緊來信！」用阮老母創教學會的講法是「體驗分享」，若基督教可能講「神蹟」？

Thn̂g-thn̂g台語文寫作會友志講，咱台語嘛愛創一个教，分享講台語發生的好代誌，唌逐家加講台語，增加臺語人人數。咱愛有口號親像阿門、阿彌陀佛，箍逐家來信。友志講一个講台語發生的好代誌了後，咱都講：「福氣啦！」咱這个教號做「福氣教」，講台語都有福氣。

一般想著台語敢若誠悲情，是犧牲，是蹧躂，是空喙。福氣啦，予咱嶄然仔無仝的感受。我手頭濟濟工課、好朋友攏是台語牽來的，福氣啦！

陳這講伊講台語才有《鳥語士亂彈》小說出版，無伊本底欲做詩人。（毋過我想這兩層代誌無衝突啦！）這是一本台語長篇科幻小說3／25出版。我讀過其中幾篇讀了誠迷，夭壽的是逐改都斷佇真精彩的所在，親像《如果在冬夜，一個旅人》按呢吊佇遐。講是科幻，《1984》這小說若預言一項一項來發生，科幻是咱對現實的反思。我讀著的故事背景若像是中共占領的台灣，兩个查某囡仔hōng掠去集中營，想辦法欲脫走出海。聽講後來改真濟，毋知這是啥物款的故事呢？ 逐家緊買來看，講鳥語！說鳥語！鳥語說不盡！

2聽著陳芬蘭唱〈無情的火車〉，歌曲清新開闊，原來是來自美國的〈One Way Ticketzz〉，「心內茫茫／頭殼愣愣／吁~一台無情的火車向前去」副歌若像火車khong-lông khong-lông過。陳芬蘭的唱腔聽了印象真深，若司公鈃仔花，甜蜜閣清氣。

3我愛買舊物仔，一是省錢，二是好用閣好看兼特別。臺北文學季開幕活動是「吃土市集」，請作家來排擔，有張亦絢，拄好彼工我欲去臺北。辦佇客家文化公園，我為著這去學客語「幾多錢」佮數字，毋過無講著！彼工我睏3點鐘就欲坐車，規工若咧陷眠，彼工有足濟好甲若夢的代誌。我本底想欲假做一个路人，無想欲佮人盤撋，我想講啊平常時嘛無佮遐的人來往，應該無人會記得我是siáng。去張亦絢的擔仔，伊連鞭就認出我，掠我金金看，我想這時若無相借問無禮貌。用底片相機佮張亦絢合照，毋知相片生按怎？毋過我用目睭共彼工記入心。以早我共人講家己無代誌就咧讀冊，別人感覺按呢chín無聊閣無生產力。寫普魯斯特問卷用著我以早讀的冊，張亦絢呵咾我：「有讀冊喔！」太光榮啊～！我以後繼續認真讀冊。我定期讀張亦絢的雜唸，伊定定引經據典分析文本。做作家毋通干焦感性，理性佮智識嘛要緊。

共作家買物仔，我私心想講彼物仔有魔力，祝福我寫甲長長久久，這是迷信。彼物仔正經媠閣好，來抾俗。我共顏艾玲買2領衫佮真珠編的手指。去崔舜華的擔仔有一个金手環仔誠特別，我戴看覓，彼手環仔若像放大的結婚金手指中央有一粒璇石，戴好了後就敨袂開，閣若像手拷。結婚簡單欲脫身來離緣就無無簡單。伊請我坐落來好好仔研究手環仔的機關，袂當硬挽，角度著才通開。我摸一下手環仔就敨開，這个怪物仔愈看愈佮意，chua̋n共伊買。