3尾兔仔26／2／13

初一、老師台語遮爾好、妄想代理人

1這篇是咧咱人初一（新曆2／17）寫的。聽厭世動物園EP17-政治幕僚的過年飯桌學，片頭廣告是過年無聊坐膨椅掰手機仔，緊下載這款交友軟體，足濟人陪你開講度時間。

這个廣告足寫實，節日的客廳就是這个款。無啥話好通講，飯菜嘛無好食，號做親情五十論真是無情無義。到底是按怎愛盤車去到位受折磨。我飼Pong — ê了後就用愛顧兔仔做借口，過年都一个人過清幽自在。

一人一家代，公媽隨人祀，有影是按呢。大部份阿公阿媽過身，這个家就散啊，兄弟姊妹無來往。抑是有人結婚，就換去別位過節。若是人情世事攏毋免陪，通家己揀欲按怎過，我看足濟人欲揀家己過。散赤也有優點，毋驚做毋著就無財產繼承。無人管，隨在家己過。

2參加台語家庭的活動，課表訂台語8成，講師煞直直講華語，華語占甲6成，我聽甲足刺鑿。若是十年前，我會直接kiāu佮講師冤。我想一站仔，想甲講座到一半，想著美妙的辦法，我攑手講：「老師台語講甲遮好，敢會當加講一寡？咱台語活動台語愛占8成呢。」彼个講師聽了猶是無插我。哎，欲聽台語哪會遮難著。文化部補助台語家庭活動，講師是有領講師費咧，請講師自重。民眾拄著這款愛講華語的講師，免佮伊客氣，當場反應，閣無改善就寫批共文化部投。台語活動直直講華語是詐騙。

3妄想代理人是今敏的作品。初看故事紹介，我掠準講親情Jojo彼款替身攻擊。這部作品無遐輕鬆。網路訊息傳播真緊，無影的代誌講甲若有影，落尾正經成做真的，真真假假真惡分辨。逐家閣足愛傳負面、惡質的代誌。

今敏足gâu掠針對女性的惡意，女性受害者講少年攑球棒摃伊，警方煞憢疑伊咧妄想。到第二个受害者是查埔，案件才成立。怪奇的代誌發生啊，犯人死去啊，受害者愈來愈濟，少年球棒親像幻影，無實體的幻影咧刣人，閣隨時隨地犯案。真濟人艱苦甲欲死，向望少年球棒共伊刣死好解脫。人的惡意佮妄想若泉水流無停。逐集若一个夢閣一个夢，其中一集少年球棒共動畫工作室人員全部刣死，順紲紹介動畫人員職務佮工作流程，意外的趣味！閣有網友相招來自殺，少年球棒看著in顛倒驚甲旋走。妄想代理人共無影變有影處理甲真好，謠言害死人，有影。