3尾兔仔26／2／3
陽光女子合唱團、春天佇佗位、嫌無夠好
1《陽光女子合唱團》是查某犯人的合唱團。主角李惠貞監獄內飼家己的查某嬰仔，上久通飼到3歲，毋過in查某囝目睭無好，愛送到外口治療，惠貞組織合唱團唱歌來佮查某囝相辭。逐人攏有逐人的艱苦，逐个犯人攏有伊的困難，人家己決定欲做歹代誌，加減有環境所致。這部劇予人思考犯人人權佮校正的意義。這陣咧讀台語版《悲慘世界》，佮這个主題有相應。
我足愛孫淑媚，我直直咧想淑媚伊足古錐的。
有一个電影分類叫Tearjerker，意思是人看了誠愛哭，愛哭片。我袂記特對當時、佗一葩開始哭，屎無聲無說著津落來，出戲院面有目屎痕，目睭澀澀紅記記。看著演員哭，我擋袂牢綴咧哭，𪜶哭無鼻水哭甲真媠，我是窒鼻閣毋敢擤驚擤一下傷大聲。料算這部劇一半以上，鼻水一直流，我若一隻魚仔用喙喘氣。哭了傷久，無啥會記得咧搬啥。這齣賣了真好，戲院大間影廳咧放通坐700人，我看早時10點上早彼場，閣有欲一百人來看，真感動！我建議莫親像我下早就來看，哭了無氣力做工課，食暗才來看較好。
2看Pong — ê毛草就知季節咧變，春天欲來啊！兔仔換毛就䆀，舊毛聳聳花花，新毛幼閣烏，兩種色濫糝做伙。舊毛膨膨飛，我衫仔全是伊的毛，我著愛較捷共伊捋毛，予伊換較緊咧。我去兔兔窩，兔友的兔仔都咧換毛，兔仔𪜶敢若同齊講予好勢這陣著來換！
《春天佇陀位》是一塊台語囡仔歌，嘛是囡仔故事冊，閣是一齣台語囡仔劇，由台語共學團的台語囡仔佮家長做伙仔演出。這是台語人對囡仔的愛，歌曲佮故事、畫圖、演戲自頭到尾，攏是家長發揮各自本領合作的成果。《春天佇陀位》m̄-taⁿ囡仔佮意，大人聽著嘛佮意。黃靜雅的歌聲有影媠氣。有一句歌詞講「春天佇陀位／我去問貓咪」，問兔仔嘛有通喔～
3想著一寡長輩，in比我較有文化額（cultural capital），共我關心講哪會無啥物活動。我知影in無歹意，毋過聽著這款話若像嫌我真無路用，無夠拍拚是毋？我後來想通矣，無應該歹勢笑笑予伊過，若共我嫌，就予我錢，予我工課做，邀請我做講座。這就親像親情五十問序細無欲生喔，你就大方共伊討錢來育飼囡仔。過年欲到啊，做序細的莫客氣！