3尾兔仔26／1／3
水乳交融、買卵、想通嘛無效的神祕旅行
1《馴羊記》讀了足想欲啉蘇油茶。台中有幾若間西藏料理餐廳，進前有啉過，家己做看覓。食譜影過一改，茶、鹽、糖、牛奶佮bá-tah厝裡攏有，gá-suh捘予開茶煮甲有芳氣，閣摻摻牛奶佮bá-tah。酥油茶上重要就是愛抐甲水乳交融，我提彼枝抐卵的來抐，按怎抐猶是油水分離。想袂到「水乳交融」m̄-taⁿ是一種比如，閣是一種現象。
食譜閣讀一改，今西藏人普遍用機器絞，果汁機嘛會用得。絞好閣倒轉去鍋仔燙予燒，煮牛奶茶千萬愛注意毋通煮甲滾，按呢牛奶就無芳氣啊！
西藏人酥油茶食鹹的，我感覺干焦鹹味真奇怪，我有下糖佮鹽，調甲鹹鹹甜甜，換西藏人感覺真奇怪。果汁機絞過的牛奶茶滋味特別厚，親像以早食過的牛奶茶敢若水咧，天氣真冷啉一杯足四序。
2定定去的菜市仔，有一擔咧賣走地卵，卵仁卵白分明，卵殼𠕇雞仔食真好的款，品質好價數嘛袂比超市貴。我家己去買的時，頭家問我：「你男朋友哪會無同齊來？」進前有幾改我佮伴同齊出門，拄好愛買菜就來菜市仔。平常時仔我家己一个人來買就會用得，菜嘛無重甲一个人捾無法度。今仔日我貧惰買菜，叫阮伴去，賣卵的講：「論著你來買喔？」按呢講就買予人感覺無爽快。
3《懂也沒用的神祕旅行：小說家金英夏旅行的理由》
佮以早讀過的遊記全然無仝，讀甲誠心適。若講旅行佮寫作有啥物相𫝛，就是若無行到地就毋知。這本冊是旅行的意義啊！（陳綺真的歌聲）
金英夏的小說嘛真好看，伊的語言佮角色的心態，有怪奇、新奇的感覺。
