3尾兔仔26／1／13
冷吱吱、宛如阿修羅、向日葵的季節
1 到十一月底才蓋寒天的棉被。棉被拍著㽎咧㽎咧，阮兜兔仔牢著這號歹慣勢。穴兔愛用雙手挖塗屈勢猛掠，家兔嘛有種著，毋過阮兜兔仔嫌塗lah-sap，伊佮意拍枕頭、地毯遮的物仔。伊透早拍棉被，好耍兼叫我起來共伊飼，我共伊挲挲咧閣真愛睏，眯一下伊就拍我的手，對我真酷刑。
寒天手冷吱吱，寫字拍字無靈活。影著冊櫥仔有一隻兔仔尪仔，我雄雄想著伊腹肚內是亞麻仁籽，微波了後通做焐燒包，手摸著真緊著燒烙。這是佮繭裹子買的，公平貿易認證的公司。尼泊爾的臭耳聾婦女用布幼仔做尪仔，環保閣會當改善在地人經濟。幾若年前參加交換禮物，才熟似繭裹子，買來送朋友佮家己用。這馬尪仔欠貨，𪜶主要是咧賣衫仔，嘛有揹仔佮帽仔等等。品質好閣有理念我真佮意。
2《宛如阿修羅》是咧講四姊妹仔發現老爸外口有查某人。劇情有時仔沉重有仔緊張，劇中食飯的鏡頭，觀眾看著小歇喘一下。導演是是枝裕和。人做伙就是咧食飯，《橫山家之味》伊共食飯翕甲足有滋味，m̄-taⁿ是食物，閣有那食那講，老母暗飯食食咧開始放唱盤，全家伙仔面頭前講以早翁婿外遇，去愛人兜約會母仔囝徛咧下跤聽著這塊歌。溫馨暗頓就成做恐怖片。
佮伴閣看一改《阿修羅》，舊年我是家己一个人看。料理翕甲足好食款足唌人，彼當陣我都有煮予阮伴食，重看的時想著這層代誌。Eng暗煮壽喜燒，豆腐、苳蒿、金針菇下落去，一鼎豐沛閣好看。牛肉燒燙燙食了誠補。
3烏克蘭的戰爭毋是自2022年才開始，羅西亞早著咧數想。
《向日葵的季節》記錄2014年東部戰爭。作者Igor T. Miecik是波蘭人，譯者是林蔚昀。用作者的家族故事，來了解波蘭、羅西亞佮烏克蘭複雜的民族歷史。外媽徛頓巴斯生3个查某囝，in母決定做波蘭人，兩个阿姨一个做羅西亞人，一个做烏克蘭。咱綴著作者去烏國東部康斯坦丁諾夫卡in外媽兜，伊細漢時渡假的所在，到地才發現以早好耍的遊樂園，鬧熱的城市全無矣，這就是戰爭。
閣較早我讀過《企鵝的憂鬱》，作者佇1995年開始寫，蘇聯拄解體。小說氣氛若間諜片，罩霧真厚，神祕人士穿烏裘仔來無影去無蹤。消息就是機密莫問是按怎，四界是謠言，逐人都講無準。彼陣我叫是這是小說世界特殊的氛圍，《向日葵的季節》讀著嘛有這款不思義的感覺，彼大濛霧愈讀就愈清楚。
AP網鍊（讀了若有佮意，用這个頁面買冊通予我趁著回饋金，予我有閣較濟錢買冊，多謝支持。）
向日葵的季節 - 伊戈爾．T．梅奇克 | Readmoo 讀墨電子書
《向日葵的季節》電子書 - 這是心中的風景。這是我們的祖國，我們的烏克蘭...... 「去找我姊姊。」母親說。「...moo.im