1頂禮拜我生日彼工,上課閣上班無閒chhih-chhih,無時間慶祝。拜六同事招阮去in兜烘肉,拄好有siăn-pái嘛十一月生,同事買雞卵糕慶生,我海岸抾著鱟。同事出手chín大方,烘龍蝦、牛排,烘甲皮酥酥肉幼幼,調味干焦搵鹽食原味,烘肉工夫較贏phu-lóo烘肉店。對十月看動畫影展到今,逐工出門,毋是辦代誌就是上課上班。
今仔日11/14(四)台中落雨規工,才通歇睏踮厝裡。無閒甲欲反去,全是咧無閒別人的代誌,欲共一寡佮台灣話無關係的工課辭辭咧。
我買予家己的生日禮物是鄭家純的羊絨頷巾,幼閣溫暖,chín滿意。
天公伯仔嘛有送我禮物,社區回收區抾著古早手工玻璃桌頭燈,現省千五,請朋友換感應器,規台新點點chín光明。
chhih-chhih這个詞,通常人會講無閒chhih-chhih,閣有雄chhih-chhih,熱chhih-chhih形容chín鬧熱,頭殼chhih-chhih是講人chín戇。有一句話講無閑chhih-chhih煎蟳炒蠘鍋雞煠鼈(bô êng chhih-chhih chian chîm chhá chhi̍h e koe sa̍h pih),這句讀著正經有夠無閒。
2台中動畫影定,看十幾部片了後,Mihaela MÎNDRU的《烏海的囡仔》(Children of the Black Sea)印象上深,我佮意這部片色水清氣閣溫柔,形體佮故事嘛真簡單,看了有尾韻,親像囡仔古短短煞予人定定想著。
烏海的囡仔療養院,有一个新來的查某囡仔,伊恬恬無話,頭鬃尾長長結葡萄色chiŭ-chiú。囡仔佮伊耍做伙,同齊接受治療。到片尾逐家才知覺著毋知伊號做啥物名字,毋知伊對佗位來。伊講是恁攏無問,伊講出家己的名字。
聽著伊的名字,我無法度確定伊是佗位的人,我對動畫講的羅馬尼亞話無熟,背景嘛無寫甲真明,伊像徵千千萬萬戰爭中受難的囡仔。伊用家己的話表達家己是啥人,重點是伊表達矣,伊的朋友尊重伊,喝伊的名字。
《烏海的囡仔》設定地點是烏克蘭的Serhiivka,海墘仔風景區,導演細漢時定定去遐的一間囡仔療養院,2022年羅西亞轟炸遐,記持中的建築無去矣。
用人認同的話去喝彼个人的名字,這層代誌足有意義。我的筆名是台灣話,護照的拼音嘛是台灣話,毋過大部份的人,特別是無熟似的會先用中文讀我的名。我都會糾正in,我的名字用台灣話講的。到我這沿的人,是按怎台灣話無啥會曉講呢,代先咱的名字就毋是用台灣話號的,予咱佮家己的文化斷根矣。阮母好請算命仙號名,用中文想的名,佳哉用台灣話唸嘛會通。
3梓冊房11/15禮拜日有台語市仔,我會去排擔仔。最近綴黃瑪莉老師學春仔花,我會紮練習作品,紹介台灣工藝,有傳統的頭插,閣有纏花冊楔仔。準備台語詩集欲佮逐家分享。
▍台語市仔資訊
日期|2026年11月15日(日)
時間|13:00–17:00
地點|梓書房,台中市西區福人街89號









是講我無確定阮兜的講法敢算臺中腔,
毋過阮兜是講bô-êng chhi̍h chhah 就是
桌頭燈有影足súi ê neh