1我定期去捐血，感恩阿母共我生甲真健康。去捐血幾若擺，查埔查某的比例大約是五比一，毋知敢是較濟查某生成較欠血。捐血進前護理師問幾若个問題，確定健康狀況，其中一題是查埔同性性行為袂當捐血，這是歧視逐家to看現現，逐改看著這題心內攏足刺鑿。
2黃文雄的紀錄片《風吹》，這部紀錄片無好看著，串流佮電影院攏揣無。
寶島少年兄有一集訪問李惠仁，聽了足想欲看。
高中的時去一間冊店，有賣人約盟”Let me stand up like a Taiwanese! “的紙膠帶，看著這句話就足感動，這捲我買到今十幾年，猶真好用膠帶品質好。彼陣毋捌黃文雄，刺蔣案嘛毋捌聽過，毋過我知林宅血案，咱仝鄉的。
頂個月蔡其昌的臺灣尚勇協會佇台中有包場放映，我有去看。先讀過黃文雄的小妹黃晴美寫的〈追想四二四事件 kap gún tau〉，《台語現代散文選》有收。我佮意黃晴美的台文文章，嘛愛伊的穿插，媠氣袂奢颺有氣質。
了後閣看四月公視限時放《424春雨》，導演馮賢賢袂曉講台灣話，黃文雄中文受訪表情嚴肅。李惠仁導演用台灣話佮黃文雄開講，黃文雄會講耍笑，閣會那講那笑誠放鬆，伊講台灣話才是講心內話。我問導演黃文雄講中文佮台灣話chín無仝。伊講黃文雄失智矣，講中文食力，講母語較直接，免踅來踅去。本底這部片欲等百年後才做，毋過黃文雄失智閣拄著火燒厝，伊當咧寫自傳草稿資料全燒燒去。導演想講上無在生的時，黃文雄閣有《風吹》通回憶。黃晴美後來嘛失智啊，干焦聽有台灣話。母語是記持的路，咱袂當對記持講白賊著無？
黃文雄流亡26年，出國是緣投飄撇少年，回國一隻かっぱ（河童），頭頂無毛。伊流亡彼陣做園丁種菜，花園媠甲雜誌嘛來翕。戰後物質欠缺，伊自細漢共老母鬥種菜，伊真𠢕種物件是生成會曉。流亡是啥物感覺？黃文雄無講甲真明，讀邱永漢的《看不見的國境線》的〈香港〉，才知流亡袂輸無期徒刑，毋知當時會當轉去，毋知欲艱苦甲當時。
刺蔣案了後，黃文雄選擇人權，比起政黨佮政治這閣較重要，這嘛是咱追求民主的因由。
3十月台中動畫展，看著真濟特殊的作品，後一期寫。電影看了日頭暗矣，若是8點這款奇怪的時間，上理想就是去食小川家。台中影展攏是佇大魯閣威秀，佮忠孝夜市chín近。小川家的查某頭家是日本人，味正港閣清氣。招牌是牛肉刺奶丸仔咖哩，牛肉丸仔phû甲酥酥袂厭，飯煮甲粒粒好食，咖哩芳貢貢，會當講是完美的咖哩飯，好食甲喙舌攏欲晡落去。點心烘不忍，袂輸大飯店的手路，我認為是全台上好食。小川家食飯時間上無愛排半點鐘，8點去食免排隊，閣搶著上尾一碗牛肉刺奶丸仔咖哩。
