1《性命美好》冊面作者微微仔笑,性命真美好謼,掠準講是無聊閣淺薄的冊。看予真咧,作者是Gisèle Pelicot。這是轉角國際daily podcast講過的案件。In翁偷偷仔摻迷姦藥仔予Gisèle食,招人強姦伊十幾年。
新聞中一般強姦案受害者隱名崁頭崁面,無欲予人認出來,「強姦受害者」這个標籤足沉重,親像一世人攏袂好啊。Gisèle反轉這款印象,強姦犯才愛知見笑掩掩揜揜,伊完全無做毋著。一般強姦案真歹揣著明確的證據,毋過in翁錄足濟影片,罪刑都保存甲誠完整,終其尾起訴51人,全部判刑。
這本冊毋但是強姦案,閣是女性的眾生相佮歷史。Gisèle寫少年時西蒙·波娃出版第二性,伊知影毋過無掛意,伊當咧戀愛,婚姻美滿。意愛的翁婿煞來反背伊,伊早就眠夢著,敢若知影範勢毋著,毋過毋敢去想,siáng會對心愛的起憢疑?越頭看女性主義猶是共咱箍起來,女性主義毋但服務女性,是為著全體人類的人權咧拍拚。《性命美好》Gisèle寫真濟父權佮暴力,家庭的祕密,見笑代。咱攏知空喙欲好,著愛先清予清氣。
面對災厄,Gisèle無予拍倒,親像莿phè互火燒,總是無燒去。伊猶原有愛的向望。
2深澤七郎的人間滅亡,讀著誠有啟示。人生茫茫渺渺,真心推薦逐家都來讀,讀了百面人爽身體勇。人生有真濟可能,到底欲按怎做?又閣有按怎的標籤咧?閣愛完成啥物使命咧?深澤七郎寫連釋迦摩尼佛嘛毋知是按怎伊會生落來。親像勸世歌咧唱:「死傱何去生何來。」咱毋知按怎生,當然嘛會使啥物攏毋知就按呢活咧。伊對人干焦一个要求,共家己飼飽,按呢就自由矣。
冊面的樹懶有夠讚!
3文化部舉辦「臺灣文化日」,紀念臺灣文化協會成立105週年。獨立冊店咖啡廳參與活動,提文化記持光批寫對文化佮未來的想像,就會當得著布鉼仔,聽講真搶市,慢來就無矣。聽講中部地區賰南方書店,in較晏收著布鉼仔才猶未發了。我去邊譜換的。我寫台語是台灣文化的底蒂,無母語就無文化。邊譜冊店是寶庫,有足濟絕版的新冊,頭家惜冊無退轉去,囥久就按呢絕版矣。上新出版的人文冊嘛看會著。邊譜冊店是一粒一的。





