3尾兔仔25／5／3
宇宙地圖、貓仔佇火星、在書宅
1 我共圖書館的頭路辭掉了後，借冊證隨phàng見。做館員的時，我不時咧想圖書館上好關起來。
讀者大部份攏真好，痟人有幾个就予人真歹過。
我服務的讀者有一半都咧借言情抑是修仙小說，若是圖書館親像租冊店按呢敢著？
圖書館是人民上親近、上好接觸的文化機關，咱國家予圖書館館員領上基本的月給，閣愛論班，假日無歇睏。館員服務讀者掠外，愛做文化活動宣傳佮執行，閣兼清潔員拚便所倒糞埽。當初接做館員就知工課雜，上䆀的是頂司伊這个人若像俗諺講的：「大鼎未滾，細鼎沖沖滾。」伊袂曉閣假𠢕，就共伊講按呢袂通，硬欲去挵壁，了後怪下司無能。
阮頂司早時九點上甲暗時九點，上班來逃避生活的空虛。伊共下司摃情，有時司奶有時使性地，干焦下司袂拒絕伊變態的情感需求。我上班三工就開始揣新的頭路，若繼續踮佇遮我會蔫去。見擺拄著朋友就講咧允頭路，我足好運這个爛工課做一個月半爾，隨有人紹介我畫廊的頭路。
《宇宙地圖》用淺白的語言佮大圖，紹介曠闊的宇宙。超過一億公里十的八次方，超過一千光年，在我來看就遠甲久甲無法度有具體的想像。高中彼陣我上愛地科（毋是講假道理的國文），看宇宙的相片，遙遠的星雲，脫離現實，今的痛苦佮煩惱佮宇宙比是遐爾仔細，宇宙誠有改鬱的效果。
2《COWBOY BEBOP》（星際牛仔）是少數我認為畫面佮配樂足四配的作品，音樂好聽閣引𤆬氛圍。配樂若䆀，聽著知欲逼人感動，我都想欲笑。
《攻殼機動隊》嘛有伊作曲，原來我足早就聽過伊的作品。
《COWBOY BEBOP》主線劇情是男子漢死鬥，我顛倒感覺真無聊，牛仔早慢反背彼此，放銃取人性命。查某是插曲，才是這部劇點睛開眼，有情感重量好看的所在。菲咧揣記持。艾德耍甲反過去，快樂毋免理由。愛因是科基犬，劇組共科學狗仔加入故事是天才！〈貓仔佇火星〉（Cats on Mars）是艾德出場曲，伊是地球人煞有火星腦有夠狡怪，我足愛伊的。
故事中地球毀滅矣，星石落甲親像雨，地球挵甲糜糜卯卯無適合人蹛，大部份的人蹛佇火星。規粒地球成做人類文明的遺蹟。劇組共當時1998年的科技畫入去，對主角來講顛倒是古董。對未來來講，毋管現今偌發展的物仔，攏是古早古早的老古董，予人異樣的感受。
《攻殼機動隊》的政治社會陰謀，干焦是這个作品的皮，上好看的所在是舊科技中的靈魂，共意識寄佇放電影的機器。素子看著舊物仔想起的記持。人看著歹去的物仔、拍荒的所在，引𤆬人去想著古早古早的記持，咱人有靈魂才有記持。
3在書宅是綠開的冊店，開佇鹿港小鎮四箍圍仔，四界是田佮厝宅，遊客袂經過的路。綠品味足好，伊揀的文學、性別理論作品攏讚甲削削叫。在書宅的冊櫥仔矮矮，塗跤鋪墊仔，予人坐落來沓沓仔讀。鹿港古早古早生理真交易，文人足濟，落勢了後傳統文化猶閣有，毋過欠現代文學佮當代研究。書集喜室較濟古早、地方民俗的冊。在書宅較濟性別主題的冊，遐嘛有咧辦讀冊會。推薦予欲去鹿港耍的親情好友，拜拜了後通去踅冊店。
