3尾兔仔25／5／13

鉸頭鬃、小丑仔、台譯納尼亞傳奇

1去鉸頭鬃，予仝一个設計師鉸欲三冬矣。個人工作室，見擺去講佮以早仝款，伊都共我鉸上媠的頭。伊講我的頭鬃今摸起來真幼。歹勢講以早貧惰洗頭，兩工才洗一擺，最近傷熱逐工洗。頂個月設計師提醒我，吹頭鬃照髮流順順仔吹，莫共頭毛掀起lih吹。以早頭鬃粗閣焦，這馬摸著若絲，干焦改變兩个慣勢，就差遐爾濟。

2《暗黑騎士》的小丑仔親像一隻狗仔，伊愛吐喙舌、亂吠、逐車仔、忠心（對密婆俠）。我無感覺伊恐怖，顛倒是愈想愈萌，護士裝有夠讚。病院爆炸，遙控加揤幾个，第二波爆炸，連家己嘛驚一趒，粗心笑詼是小丑仔的本色。

伊愛密婆騎o͘-tó͘-bái俠挵過來，欲佮密婆俠同齊死。伊無計畫，開銃攏射袂準，伊愛炸彈，免對準就爆炸。伊若是佮密婆俠挵做伙，這改伊百面通對準，袂輸是佮密婆俠相攬深深。

塔羅牌的戇人牌，伊傷樂觀，行甲山崁嘛毋知驚，狗仔相陪，那行那跳去送死。

吊人牌，伊是得著真理的聖人，嘛是死刑的犧牲者。小丑仔就是這兩張牌。

伊予密婆俠倒吊，頭拄仔鏡頭伊是反的，鏡頭閣反過來，伊的面是正的，伊的衫仔受地心引力膨起來。伊的世界作用力透底顛倒，倒過來成做正面，顛倒顯出伊斬然異常。

3《台譯納尼亞傳奇 — 獅仔、魔女佮 Thàng-suh》台語翻甲蓋正港。

「（露西）伊知影若是無細膩共家己關佇櫥仔內底，就有影袂戇甲袂扒癢，所以伊共thàng-sù的門小可寄咧，無關甲峇。」

細漢時無啥讀囡仔古，真愛讀大人世界的情愛，今來讀囡仔古發見遮美妙的世界。納尼亞遐有酒神巴克科斯來拜訪，泉水成做酒，幾若工啉甲馬西馬西，想著就想欲咂一下。