3尾兔仔25／4／3

拍箍輾、豬屎花、流浪漢

拍箍輾、豬屎花、流浪漢

1食阿坤麵，我感覺𪜶的福洲丸仔湯，比焦麵閣較好食。人客濟，有一个人𤆬博美來等座位，伊跤兜邊仔狗仔拍箍輾無停。索仔愈結愈絚，主人愛共索仔敨開，博美閣咧踅袂忝嘛袂頭戇。我講：「看伊踅來踅去足古錐。」主人講：「伊予人退貨一擺。我有𤆬伊去予醫生看，」伊手咧頭殼邊仔比一下，意思是頭殼歹去才直直拍箍輾。

我細漢時足愛拍箍輾，袂輸竹田嬰踅甲欲飛起lih，踅甲徛袂chāi倒loeh，頭戇戇，我佮意這款感覺。有兩肢跤就通開始踅，簡單簡單飛離現實。兔仔跳舞嘛是拍箍輾，走甲會起風，看袂清形影糊做一丸，檢采伊嘛是佮意踅甲戇戇。

少年兔仔定定跳舞，老兔較無愛活動。我若是改變兔仔的遊樂場佈置，囥無仝大細的紙箱，做新的磅空等等，抑是飼草仔條，Pong-pong較會跳舞，我見擺看著伊跳舞心情都足暢。

2 豬屎花開，逐年春天佮熱人交界彼陣臭一個月。進前寒天無遐冷三月就開花，今年寒天親像古早正港的寒天延甲四月才開。台中公園以早有神社，神社拆了了賰石埤，入口就有一欉豬屎花。揣日本時代相片、光批對照看，豬屎花是後來種的。我毋捌看過廟邊仔咧種豬屎花，臭mo͘-mo͘鼻著起倒彈，siáng敢倚近。

3逐工來圖書館報到閣踮規工的讀者，毋是流浪漢就是老歲仔。天氣熱流浪漢臭味重。圖書館員月給干焦基本薪資，我感覺家己佮流浪漢不離仔近，無存款無買厝，萬不一有啥物意外，我閣有火車頭佮圖書館通蹛。流浪漢常在用飲水機，泡麵沖燒水就是一頓。老歲仔有厝通轉去，毋過𪜶食的嘛佮流浪漢差不多，大碗麵醬包抐抐咧。中晝頓我會去四箍圍仔的食食店，食一頓燒飽，薪資有夠少，上無食飯開家己趁的，食甲真安心。