3尾兔仔25／4／13

騙家己、遛皮、êng-sêng

1我聽過對人性格上嚴重的批評是：「連家己嘛騙。」

2 柴屐都送去臺南補鞋仔底的膠。穿上媠的彼雙懸踏柴屐出門，平常時嫌麻煩無啥咧穿，鞋仔底閣真完整。掠準佮朋友食中晝袂行偌遠，食飽了後行美村路，踅綠園道一大輾，坐兩間咖啡廳，暗頓食鹽水意麵。全身軀重量硩咧跤尾，轉來厝裡跤捗痠甲袂輸斷做兩節。
朋友用一枝手食飯，另外一肢藏佇桌仔跤。會記lih伊是好禮的人，應當知影一肢手食飯誠無好看。影著伊一雙手遛皮遛甲無一塊好，講八點鐘久煞毋敢問。

我留學彼陣天氣若冷，手都開始遛皮，指紋攏無去，一年有半冬一雙手爛糊糊，料算是壓力大害的。

3買呂美親的《方言歌》佮周盈成的《1984台文版》。足期待讀這兩本冊。

《都柏林人台文版》譯者是劉盈成，《1984台文版》譯者是周盈成。Êng-sêng這个名是用台語號名，都有êng的音聽著真順，這馬的人名字用華語號名，用台語讀都無遐媠。