3尾兔仔：25／2／3（晏）
讀予你聽
1 我拄著一个畫家，伊面看起來真幼，親像佮我差不多大，毋過伊人大我十歲閣有一个幼囡仔。伊的畫予人足溫暖閣古錐。伊講伊有小可仔閱讀障礙，伊讀物仔頭殼無聲音，伊共字當做圖來理解。予我想欲共3尾兔仔的內容讀出來，予這个連載閣較無障礙。
真濟人聽有台語煞讀無。我初學台文彼陣真緊就讀有矣。我想無平平是漢字呔會讀無？台語友志共我講，一般人讀著台文文章，頭殼內是華語的漢字發音，當然意思鬥袂峇，愛用台語的發音來讀，按呢才讀有意思。現實上有真濟人，真想欲共台語學予好，對台語有好的感覺，毋過台語相對其他優勢語言，教材佮書面的資料較少，欲學愛家己真骨力。
有一場活動我用台語來紹介家己的小說，有人耳空掩咧無欲聽我講，嘛有人誠實有聽入去，伊講若用讀的伊無法度，毋過聽我講就讀通理解。我一直無佮意家己的聲音。應該講我不時有想欲處死家己的想法，我認為家己是遐爾仔無值得的物仔。毋閣因為我講台語，真濟人呵咾我講台語的聲音真好聽。
傳統文學，字毋管話，現代文學，字愛照話。字佮話是無仝的媒介，無可能完全鬥甲峇峇峇，字有偌倚近話，這種語言就有偌現代化。白話文終其尾，猶是無夠白話。台語的白話字就真白話。
碩士口試美親先生予我的建議，若像上苦的藥仔嘛是上補藥仔。伊講我華文寫作，寫甲真口語真媠，台文寫作反倒失去這个上大的優點，不文不白。伊想無我台語講甲真好，哪會寫甲按呢。予我學著愛那讀那寫。寫台文予我的語句變甲短閣簡單。我嘛比華文寫作閣較計較文法。以早留學有學語言學，分析語句結構，無疑悟我閣用著啊。
若是有通簡單就莫複雜，這是上媠的形式。
2 踅冊展，讀書共合國有放影片紹介in下跤個個出版社，其中有八旗總編富察的影像，我看著足感慨。佇2023年3月尾，伊人佇中國失蹤，到今猶未轉來欲兩年矣。
我有電子冊閱讀器，我會買的紙本冊賰，香港奧門的冊佮漫話。現此時彩色閱讀器的色水，拚袂過紙本彩色印刷豔彩。我對色水敏感，毋過柳廣成的烏白素描，伊的筆觸予我足飽滇，袂輸誠實摸著，遐有血有肉。拄好拄著伊有來「香港文學生活館」簽名佮畫圖，卯死矣。
研究所有新加坡教授，伊考阮敢有知影任何一个新加坡作家，考倒全班。我心內有幾若个馬國作家名單，就是反無一个新國人。這个教授予我注意著新加坡文學。我去新加坡的華文冊店城市書房，這毋taⁿ是一个冊店嘛有咧出版冊。頭家閣共我介紹啥物是好紙，就是khǹg十幾年攏袂黃袂變質的紙。我有掀著先生紹介新加坡大作家的冊，無我的緣，白滾水彼款的文字，我食無滋味。我反倒愛著黃凱德，伊的冊予人活潑閣美妙，讀伊的作品人會重生喔。
陳靜宜的《我說福建麵，你說蝦麵》，我本底凊彩掀掀咧，讀讀咧規个人牢著，伊寫甲足紲拍，行文足清氣簡單，無飲食散文虛華的形容。用食物來去思考種族佮文化、在地風情，足siâⁿ人來讀。舒國治不時寫：「味甚好。」我讀甲接載袂牢，我可能有文言文過敏。
3名字必須通人知，予世人記甲久久長長。
我最近好運得著幾若个簽名，心愛的作品的作者拄好有簽冊活動，閣佇我做散工的所在，毋免專工拚去揣in。
作品都有作者，名字就是名聲就是才調。
讀紅玉いづき的《乘鞦韆飛翔的聖修伯里》，予我足大的壓力。
另外一个相反的作品是奇士勞斯基的《雙面薇若妮卡》，仝一个演員去演兩个人，一个人選擇死佇舞台，另外一个人選擇boăi去表演。伊活落來，去感受體驗真深的心內世界。
我讀的高中有舞蹈班，教跳舞的先生，來教普通班藝術欣賞課。伊頭一堂課，在先解釋舞蹈界，毋是親像《黑天鵝》彼款烏暗的電影，紲落來伊講伊做女主角的故事，在我來聽是「恐怖」故事。彼是伊這世人唯一一改做女主角。欲演出彼陣頷頸仔煞傷著。伊有兩个選擇，放棄這改難得的機會，伊閣會當跳舞，毋過伊可能袂閣得著做女主角的機會。另外一个選擇是上台，注射嗎啡止疼，跳甲頷頸仔斷去，了後伊袂當閣做專業舞者。伊選擇上台，到今伊的頷頸仔猶不時搐一下搐一下。
少女為著徛佇台頂，得著文學家的名號，成做表演者，毋管代價。
紅玉いづき無論寫偌中二偌極端的角色，我攏讀甲敢若真的，伊有魔力，予人沉loeh真深的激情。文學家的名號佮表演者的才藝，代表一種欠缺。馴獸師「卡夫卡」，臭蟲毋成人。默劇演員「恰佩克」，機器人無靈魂。歌姬「安徒生」，無聲嘛無愛。空中飛人「聖修伯里」，飛上天無轉來。
馬戲團主題的作品，定定真殘酷。彩色棚仔，暗bong-bong，舞台有光，馬戲夢幻，飛上天，嘛有可能無細膩lak落來，猶是遐濟人想欲peh起lih。
啥物是完美的表演？毋是上好上媠的，是逐改親像頭一改按呢來表演，仝款的表演愛予人無仝款的感覺。保持無自由、無夠分的姿態，有限中去創作無限。我掠準講家己的台語寫作無完美，就是無夠好，我無想過這毋是塹然無好的代誌。所有的創作，都是為著超越性命。少女為著永久予人記牢，一目𥍉嘛好，親像是咒誓，予人狂熱，搜揣永久無量的姿態。
