3尾兔仔：25／1／3（晏）
在夏日
1前幾工食物仔就有口味傷重，無遐好食，無好消化的感覺，中晝食飽連鞭脹氣，胃漲甲會疼，氣閣排袂出去，一陣一陣leh絞疼。室友送點心，我殘殘食loeh，看莫敢會較好，落尾參中晝頓做伙吐吐出來。
啊又閣是胃炎，趕緊去予醫生看。
頂擺胃炎予我人真艱苦，無食人足枵，食物仔閣吐，吐了人閣較荏。
草間榮的《再見馬戲團》，有一篇主角講腹肚內有蛇，窮實是伊有胃病，胃腸絞疼袂輸蛇leh kauh-kauh趖。是講台語輸入法見擺寫chò-ài，頭先拍ch頭一个跳出來蛇（chôa），害我嘛感覺chò-ài佮蛇有關係著，毋知敢是因為我捌寫蛇做主題的小說？寫幾百字蛇了後，輸入法認為ch就是欲寫蛇。川上弘美的《踏蛇》寫人leh相交的時變做蛇。蛇滑溜滑溜，纏甲櫼無縫，誠親密的感覺。
2我做散工，共人鬥擺擔仔賣冊。擺冊這个代誌，袂輸真簡單，共冊khǹg予就好，觀察各冊店無仝人的擺法，我心內嘛擺出一个譜，直直leh改進。親像理所當然的代誌，嘛有一寡鋩鋩角角。
《在夏日》是我足愛的作品，盡心leh賣，有人客嘛有佮意星溧的畫風，我chín歡喜。水彩色緻影目，色水真光，就準是leh畫共人創治的劇情，心情嘛袂遐沉重。這个作品有夢佮現實交錯的特殊氛圍。故事中動物是人的心肝穎仔。別人歹甲袂輸惡鬼。
〈在夏日〉主角柱燦的貓仔奇奇轉去矣，伊做出揣靈魂的機器，欲佮奇奇閣見一擺。若是有通莫佮奇奇分開就好矣。用機器揣著伊的靈魂，毋著通永遠做伙？有動物伴的人按呢暗想。現實中予創治的人足歹反抗，弱者敢有可能保護家己？若是做袂到著予貓咪來幫贊。貓咪一大陣hop起lih的畫面，夭壽讚。
〈Panorama〉頭起先我讀無啥有，我舞毋著夢佮現實的部份，佇這个故事中現實的理路愛倒爿。媠甲若夢天色清彩，彼是主角這馬的現實。色水殕殕若咱現此時䆀䆀的現實，彼才是主角過去的夢。上粗殘的代誌，星溧無畫出來是一逝字：上好的朋友五年前過身去。作者袂輸真佮意畫戰鬥場面。是講相拍進前，是按怎愛開3千箍買大罐的日本酒做武器leh？矸仔破去碎玻璃佮酒噴射出去，畫面真phāⁿ掠外，我捎攏無。
3發見《少年吔，安啦！》內的烏貓姊佮我髮型仝款！
我固定去的美容院，鉸頭鬃的阿姊佮阮母平大，五十出頭的款。阮進前開講著劉德華來台開演唱會，我講我較愛張國榮。伊講以早真時行張國榮彼粒頭，彼號做「半屏山」，頭鬃吹甲膨膨膨，予伊趁著袂少錢。