3尾兔仔25／12／3

大濛、下晡的鳥仔、毋成樣

1 我看日本時代劇，有一个感觸，若是無過去就無未來。日本人對家己過去的歷史調查甲清清楚楚才有才調翕。

看《大濛》若像坐時光機轉去過去，原來台灣古早生按呢。台語親像一支鎖匙，佮咱台灣的過去連結，若是劇中角色逐个攏講華語，閣是彼款聽袂著鄉音，這馬台灣人所講的華語，按呢敢會當看口？到現代語言閣變矣，查某囝講華語。這種理所當然，我看著的是語言的死亡。

入去電影院進前我干焦知影這部電影號做《大濛》，電影開頭甘蔗園，查某囡仔捾籃仔送便當。影一下我隨知這欲講白色恐怖，有人咧覕警察伊愛遐早出門送食的。這是過往看過的作品，了解台灣歷史，予我有按呢的直覺。故事是講一个查某囡仔欲去領阿兄屍體，無錢閣路途遙遠，敢若真沉重，代誌困難無望。

料想袂到，有圓滿的結局。時代動亂，查某囡仔煞順利大漢，繼續讀冊，出業做老師，有家庭有孫仔。對照白色恐怖的受難者，銃殺的無命，閣有一條命關十幾年了後孤身一人。無就是佮牢友做伴，一般人無理解𪜶。結尾查某囡仔佮當初共伊鬥相共的人相搪著，這款對照予人心酸酸。《超級大國民》予人哭甲無聲，活人成做墓仔埔。《大濛》予人看甲愛笑閣愛哭，有刺激有殘酷有溫暖，提醒咱這段歷史猶未結束。

2 下晡的鳥仔

〈夕暮れの鳥〉有奇異的魔力，聽袂𤺪。逐工聽十幾擺，有人講重複是愛，《巨人》的歌我上愛這首。第二名是〈僕の戦争〉，攏是神聖かまってちゃん的作品。𪜶的曲足美妙，毋過の子唱甲若破雞筅，我聽袂loeh。𪜶為《巨人》做的兩條歌，歌聲調甲足電音，聽袂出來是の子，顛倒chín好聽。

《巨人》的氣氛佮國際情勢，予我想著第二改世界大戰的日本。自覺比其他國家無落後，拚命研發科技驚綴袂著別个國家。足驚予人侵略不如先發動戰爭。人類驚惶巨人，巨人嘛是。

〈夕暮れの鳥〉聽幾若擺，攏聽無咧唱啥，我閣掠準是德語。去看歌詞才發現是英語歌，斟酌看嘛看無，用google 翻譯共日文轉做英文。到今google 翻譯的日文猶是爛甲欲死看攏無。錯誤的語言，看無的MV，袂輸謎話，猶是遐爾有魅力。

3毋成樣

做幾若个散工，有台語事工，嘛有臨時工，排班的工課，無正式的頭路。閣有無錢的「工課」，這款我就無啥耐心做，看心情做。

我袂討厭簡單單純的工課，總是有人愛去做（我是文學碩士，同事是藝術碩士，阮笑講碩士哪會佇遮做這款工課）。想著別人按怎看，就會感覺家己無應該閣做，應該去揣一个親像碩士的頭路，政府向望碩士月給愛有四萬的款。我有拍拚去揣彼種，一禮拜五工的頭路。我有請人共我鬥看履歷，指點面試，就是揣袂著，敢若是我chín無能。

人生的大栽問：「是按怎我佮一般人差遐濟？」

我毋知欲按怎處理心內的怨恨佮痛苦，遐複雜深刻的情感。真誠甲過份，是欲按怎做才袂過界？我想家己的作品誠毋成樣，結果發現有人愛家己作品的原因，就是愛彼毋成樣的痛苦。

我足討厭做講座，攏寫過矣，閣講嘛無效。這馬毋是出頭的時陣，感覺家己猶未準備好後一个作品。就準閣愛開十年才通共台語練好，我就沓沓仔練。毋管別人按怎看，我就跤踏實地去做。