3尾兔仔：25／1／23（晏）

女王頭

1袂記lih做2024的大事代回顧，2025的正月就欲過了。

月初經歷胃炎、尿眠床，欲轉去宜蘭看外媽壓力傷大。愛真忍耐才通度過。我對舊年尾就咧煩一層代誌。到外媽兜，足濟人我無熟似，表兄in佇我留學的時結婚，嫂仔佮姪仔在我來看全是生份人。佇這五年遮嫂仔比我閣較捷轉來轉來外媽兜。阿母傷晏生我，表兄表姊比我大十五歲以上，我佮in感情淡薄。在in來看我才是生份人才是。 度過這關了後，pong-pong胃脹氣，隔頂一擺發作干焦一個月爾，我直直共伊掠龍，㧣青菜予伊食，煩惱伊會死，（兔仔若傷久無食物仔，腸仔會敗壞了後死去）佳哉舞兩點鐘了後伊寬寬仔好起來。

老實講，厝內人共我講佗一个親情強欲轉去，我嶄然無掛意，我干焦掛意我飼的兔仔。我無信篤人有血緣等於有感情彼款歪理。

2去市仔擺擔賣冊，做這散工3個月偌，爸母買冊上大手面（啥物種類的冊攏會買，無一定是囡仔冊），閣來是情伴做伙來se̍h。莫怪政府都想欲逐家去結婚，按呢經濟才有發展。 有一个囡仔講話臭奶呆，料算七歲，伊共我呵咾我耳鉤誠媠，問我耳鉤啥物做的，欲佮我開講，我感覺這个囡仔以後應該足會曉phāⁿ妹仔。 3拜五暗時去女巫店聽女王頭。In唱台語。台北朋友講這是伊朋友的樂團。我聽過有幾若个台北朋友講過，我有某某朋友佇女巫店有表演喔，親像台北朋友攏有熟似一个耍音樂的朋友。 這是我頭一擺去女巫店聽表演，有一種體驗台北文青的感覺。 主唱子豪的聲音真幼，有時親像查某，有時親像查埔，伊一个人搬兩个角色，伊唱歌足有戲劇的感覺。我聽著就牢著。伊跳舞的時予人迷。

女王頭的旋律佮歌詞簡單清氣，毋過予人足深的情感。〈恬〉是子豪做予逐家好睏的歌。最近的預算案佮罷免運動，予人心浮動。佇紛亂的世間，好好仔睏顧好家己嘛是真要緊的代誌。

In唱〈冰角雨〉，關係著四六事件的女學生，回憶自傳寫走路彼陣看著冰角雨，佇台灣罕得看著冰角雨才記佇日記。女王頭用冰角雨的意象，來寫予命運挵著（講著這句就想欲唱廖士賢的〈永生〉：予命運挵來挵去）。這塊歌予我去揣四六事件的受害者名單，連家己母校的學姊嘛有受害。予我真感慨，白色恐怖的受難者佮咱遐爾近，只毋過咱毋知，咱共in放袂記去。