3尾兔仔：25／1／13

我的舊愛 你的新歡

1今年閣去踅土庫里的「我的舊愛 你的新歡」二手市仔。

土庫里是台中心適文藝行店上濟的地頭，逐年正月的時，遮真性格的行店頭家會賣啥就予人真好玄。價數真媠，我開一千一百箍買十一項雜細，有褲、杯仔佮飾品等等。買著兔仔頭的手指佮袚鍊這項上佮意，兔仔造型的物仔誠稀罕。

我固定對Murui deer起頭踅，佇梓冊房邊仔。土庫里我上熟的店干焦梓冊房，熟似頭家，心情較放鬆。逐過行到遮，袂輸予梓冊房suh入去。

2以早有「喝玲瑯，賣雜細」，有人擔兩跤柴箱仔，內面貯「花粉鏡，鉸刀尺」查某人愛用的日常用品。我無看過，聽講五十年前有。我頭一改知影這款販仔，是對Margaret Atwood 《雙面葛雷斯》（Alias Grace），有一个號做Jerome的角色做這款生理，查某人無方便出門，看著伊紮貨過來誠歡喜。《雙面葛雷斯》寫甲上好的是寫查某人扞家拚厝內：煮食、洗衫、曝衫、挼塗跤，咱罕得讀著作家寫遮細項的代誌，閣寫甲遐爾仔有滋味，寫出一个查某人一工按怎過。真成我逐工咧做的代誌。

3我有買鉸刀造型的ブローチ，古早罵查某人：「鉸刀爿，鐵掃帚。」意思是剋夫剋翁，全攏怪佇查某人帶衰。白跤蹄嘛是差不多的意思。阮兜的兔仔就是白跤蹄，現代人講白跤蹄是穿襪仔足古錐。我看冰火五重天老藝人才有講著遮的詞，現今這款話罕得聽著，時代有進步。看著這鐵鉸刀，我人狡怪，誠佮意。