3尾兔仔25／11／13
消費規則、運命命運、幾微之際
1. 消費規則
我定定去餐廳、咖啡店、冊店，一下入去就看著「店家規則」的牌仔擋佇面頭前（郭怡美冊店），抑是菜單一下掀第一頁是用餐規則（Match cafe ），逐條規則攏是漚客的精彩故事所致。我家己做工課的店菜單有寫一个人愛點一杯飲料，有个人就是貪俗，刁工四个人點三杯，規則寫予明嘛是有人欲軁空。
我做人客讀店家規則小可有壓力，親像來消費閣愛驚共頭家得失著。我足認真遵守規則，盡量做好人客。這世界就是有人，若是無講予明就講袂聽啦，𪜶袂曉做人，凍霜閣自私。
《我們為何工作》這本冊講著契約寫愈濟，代表愈做袂到。咱認為大部份人客攏是漚客，就訂規定愛𪜶遵守。袂見笑的漚客論真是少數，這就是一人做賊，一鄉受罪。
「就像經濟學家弗瑞．赫希（Fred Hirsch）在40年前說過的：「契約上寫得愈多，就愈不能期望獲得契約上沒寫的東西；形諸文字的東西愈多，仰賴於信任的東西就愈少。」不完全契約的解方不是訂定更完全的契約，而是培養工作關係，讓人想為客戶、患者、學生、及他們的服務對象做對的事。」
可比講我聽過一个人真愛藝文，毋過伊毋甘開錢買冊，嫌冊傷貴，借冊來讀，毋過彼毋是家己的冊就無珍惜。伊會佇三溫暖讀冊，冊浸過高溫水氣膠溶去規本散了了，伊歡歡喜喜講予逐家聽，這是省錢撇步。伊就是想欲那做三溫暖那讀冊，家己方便就好。伊這款人喔，不止仔勤儉喔。
臺灣人去義大利耍，十五人點pizza五塊佮麥仔酒三杯，頭家袂爽開直播姦撟。兩方確實攏有做毋著。頭家若無願意接受這種點菜方式應當講予明。人客嘛無應該因為店家無上低消費規則就干焦點按呢。做人愛較好禮啦！
2. 運命命運
運命是人咧扞命，嘛有時運鬥牽成。命運是命咧扞人。
頭一擺知影運命佮命運無仝，是讀著吳明益的《單車失竊記》。
我共《進擊的巨人》動畫看了，我感覺這世界分做有看過《巨人》佮無看過的。《巨人》好看甲，我這馬猶活咧通看著這齣劇是足大的福氣。巨人的鋪排，觀眾足好理解，逐个台詞、場景攏有意義。充分的線頭，暗示觀眾引導劇情，劇情實在有夠完美，合情合理，無靠奈何命運所逼，予人全心浸佇巨人世界。我想巨人想甲暗時眠夢著。
通共巨人當做是一種EVA，人類去操作大型人形戰鬥裝置，《巨人》的悲劇是通理解，有原因的事件。我看過規套《新世紀福音戰士》動畫新舊版、電影。老實講我上佮意電視放映的初版動畫，《新世紀》咧講不可理解的悲劇，初版氣氛真謎，實驗廣播直直放、手扶梯長甲袂死若像永遠行袂到盡頭（可能是用來拖時間），這嘛是一齣充滿命運運命的作品。讀研究所彼陣有一个教授，逐堂課百面會講著EVA，表達現代人類面對經濟泡沫，不明大災難降臨，過去的信仰佮道理崩解，人無通倚靠誠不安，不如放放放。碇真嗣是世界英雄，莫怪世界毀滅，我足怨慼碇真嗣豬哥閣軟汫閣失志。伊拄好合世紀尾的廢墜局勢，賴活抵抗殘酷。到今作品顯現新的時代風貌，倒遐爾久嘛愛徛起來啊啦。
巨人大隻閣會食人真危險。外族的人驚惶エルディア（艾爾迪亞）（台語的艾唸hiaⁿ），𪜶這族通成做巨人，有異常的能力。𪜶奢颺千年，四界戰爭，統治凌治外族人，九大巨人內鬥了後落勢。外族人佮エルディア的冤仇洗袂清。人共𪜶當做是惡魔，血液檢查共𪜶掠出來，關入去收容所，手骨掛布章，歧視𪜶，蹧躂𪜶，愛𪜶去做兵死去犧牲了後才是光榮國人。エルディア民族的命運，通講是所有予殖民的抑是弱勢國家的歷史。
大部份的エルディア覕佇壁內安份度日，接受命運就是一世人關佇壁內，壁外口有恐怖的巨人。エレン無仝，伊欲走去外口挑戰命運。有一工，超級大型巨人破壞壁，害𪜶安樂的日子成做地獄，安定的命運改變矣。
壁內エルディア人受著上大的苦難是無知，失去記持佮真相，毋知巨人是家己同胞。古早祖先貪戀巨人的力量，愛後代食人肉來繼承，致使エルディア成做愛食人的巨人。
看到一半我就咧想，怨恨的源頭來自巨人異常的力量，若欲化解按呢巨人就愛無去。
《巨人》前半段是犧牲，眾人為著生存佮巨人相刣直直予巨人食去。後來發見犧牲來自愛，愛閣是悲劇的源頭。愛是無私，犧牲家己嘛甘願，愛嘛是束縛。巨人始祖意愛國王，才維持巨人的力量，隨在國王的野心去傷害外族人，伊服從無結果的愛情，就準兩千年過去國王攏死矣，伊猶是繼續愛國王。伊成做巨人是意外，毋過創造巨人是始祖的主意。
進擊的巨人有未來的記持，白話講也都是預言，エレン發現無論按怎做，攏照伊所知的發生。人若開始相信命運無法度改變，伊就成做促成運命的棋仔。這時命運征服伊啊。毋過可怕的是，若像耍十八骰仔，骰仔停落來進前，啥人知落尾是幾點，咱人足歹確定是運命抑是命運創治，咱的認知就是咱所相信的。
用雙層的犧牲，來成全眾人的幸福。ミカサ的愛情佮エレン的性命。
ミカサ（米卡莎）細漢拄著賊仔刣死𪜶爸母，伊本底無欲反擊，伊叫是家己一个查某囡仔拍袂贏，是エレン愛伊奮鬥，若無起身對抗命運就注死。エレン為著逐家永久的幸福，伊上勇上愛自由，煞甘願為著逐家來犧牲。ミカサ共エレン當做是伊的命運，命中註定的愛。伊愛為著エレン的向望來改變命運。ミカサ自頭就叫エレン莫去舞遐有會無的，安份過日子，毋過エレン有自由的向望，伊只好綴伊參加調查兵團。有人講ミカサ全為著エレン好，是無家己的角色，伊的確有家己主意，伊為著エレン做出上痛苦的決定，這款愛無人通比啊。
《巨人》的命運下跤有三大母題，第一是選擇，人愛決定愛抑毋，全攏愛嘛是全攏無。第二是無彼款早就知的代誌，決定了後才有結果。第三是命運是人咧運命，講到尾命運全是人家己揀的。就準外口有巨人，エレン嘛是欲去外口，伊咒誓共巨人攏總刣死，伊做到矣。壁的外口是世界，毋過自由的世界煞佮エルディア人無緣。咱永遠無法度知影エレン的決定敢是上好的選擇。
3. 幾微之際KÍ-bî-chi-chè
樹仔是阮伴阿晨的朋友，樹仔來台中，頭一改見面，開講一下紹介家己寫台語作品。伊就邀請我鬥陣用好運餅（fortune cookie）做創作，誠歡喜有台語作品參與這个展。
我寫一篇覕空襲的故事，主角𤆬動物伴兔仔同齊去避難，避難包內拄好有好運餅，冥冥之中指引in，災難臨頭咱愛按怎安搭身心？
好運餅是人創作的運命，隨機的紙條仔窒入好運餅。人讀著彼句話無意中就予彼句命運的話牽去。
命運的彼句話，對我來講是咒誓。頭一本散文《我把自己埋進土裡》，來自前男友咒誓我「會走上歪路」，台語有講「歹路毋通行」，毋過我感覺伊的意思用台語講是「咒誓我人leh落去」愛我去做彼號衰尾道人。我毋管是做啥物頭路攏是正途啦。
這馬我受著的咒誓是「少年人破台語」，足濟人共我按呢講，我正經當做這是真的。2010年行政院報告，我這沿的人使用台語比例干焦7%。台語是我大學抾轉來學的。規个環境對台語足無友善，講國語是正常，講台語是欠人罵。後來我佮台語siăn-pái講：「我台語永遠學袂好。」伊聽著不止仔受氣，臺灣人學外語學甲削削叫，無道理台語學袂起來。受著siăn-pái開示，我發現原來「少年人破台語」是咒誓毋是事實。
我以早受著別人的話影響足深，共彼句話記牢牢，早慢有一工我欲證明家己做甲誠好莫看我無。學台語全無仝，我是學甲真歡喜，學台語毋是咧比啥人台語第一名。我有影認同台語足媠的。聽有台語歌，享受歌仔戲，讀臺文作品，用台語結緣熟似的好朋友佮機會，攏是台語送予我的禮物。台語拍開心內的門窗，無仝語言是無仝世界，無仝的思考，獨一的風景。
幾微之際是命運的展覽，歡迎逐家來咖朵咖啡 Caldo Cafe，欣賞命中註定的作品，現場閣有好運餅轉蛋機，看一下運命是怎樣。
展覽資訊：
《Good Lock｜幾微之際》幸運餅乾聯展
地點：咖朵咖啡/台北市士林區至善路二段390號
時間：周三到周日12:00–18:00，營業時間以咖啡廳公告為主
IG：@goodlock_fortune
