3尾兔仔25／10／3
仲夏魘、兔仔有話共你講、打造台語的Ló͘-je-tha
3尾兔仔25／10／3
仲夏魘、兔仔有話共你講、打造台語的Ló͘-je-tha
1《仲夏魘》這部恐怖片足有理路，𪜶刣人獻祭做儀式，用邪惡的傳統來消除心中的惡意，怨妒、不滿、哀傷做一改消敨，消滅個人意志，in是上無私的群體。In刁工生出近親亂倫殘障的囡仔，講伊是上純真的天使。
自由社會個人意志做判斷，有好也有䆀；𪜶全然相信群體，遵守傳統，毋管善惡，佗一个較進步？當然是個人意志較贏。
這部片翕北歐永晝，規工攏有日頭，畫面光明美麗，百花當開，毋過敢若聽著啥人咧哮。這部片無翕人哭，逐家攏歡喜快樂唱歌跳舞。上恐怖的是電影煞尾女主角總算笑矣，伊爸母過身，孤身無依無倚，今有一个群體接受伊愛伊，為著美滿的愛，放捒自我做代價。中國掠姑娘去深山內做某，《仲夏魘》是北歐的版本。查某通生囡仔，繁榮群體，做家己人。查埔是外來深入者，交尾了後，講伊是一隻邪惡的熊掠去燒死。奇妙的是電影拄開始，𪜶看著故事畫，族人解說這是「愛情故事。」《仲夏魘》的兩面手法，表面講是文化，實際上是設計好的邪惡。
2《兔兔有話說：給飼主的100項照顧守則》用漫畫來解說兔仔的行為，解答我心中足濟疑問，古錐閣趣味。
可比講兔仔是階級社會，分做老大佮細漢的。老大用頭挵細漢的，叫伊來捋毛。細漢的愛用心共老大捋毛，老大共細漢的凊彩捋一下。按呢的好處是，細漢的身軀有老大的氣味，伊就袂予老大趕出去抑是共伊創治，就算是家己人矣。原來阮兜Pong--ê定定用頭挵我，愛我共伊捋毛，是共我當做細漢的。
3打造台語的Ló͘-je-tha，《Tâigael》台語蘇格蘭話小說合輯，10／11下晡2點佇台中梓冊房有新冊發表會。「愈在地愈國際」這句話是啥物意思？《Tâigael》是這句話上好的案例。「母語」是咱佮蘇格蘭的共同記持，蘇格蘭的在地話是Gaelic，台灣是臺灣話。咱仝款面對強勢文化入侵，母語失傳的危險，這本冊由4位少年女性作家來合力完成，有特殊的意義。
文學作品上講究的就是語言，文學毋是干焦寫甲媠寫甲濟就好，愛寫甲精確，贏過千言萬語。這是我開始台語寫，費工去揣語言的「真意」，可比講這篇講著兔仔「理毛」，我就愛來想台語按怎講才正港。理毛是整理毛，意思就是捋毛嘛！
咱的傳統若用別種話講，彼氣味就毋著矣。用母語連結，咱新冊發表會就來探究語言，按怎共外國語文學翻做台語，創作咱母言的來生leh？
