3尾兔仔25／10／23

電腦歹去、Pong--ê牌亂鐘、五爪佮我

1 用七年的電腦歹去，若是修理可能真袂和。有一个朋友電腦歹去，伊彼張面不離仔憂愁，等到家己電腦歹去，我才理解彼是 — — 稀微。我感覺電腦共我反背，咱毋是講好欲做伙十年？！哪會講走就走遮無情。我後來安慰家己，電腦是機器爾爾，毋免傷心，閣買就好。

伴陪我去NOVA買新電腦，隔轉工領貨銷售員推薦我保護貼佮防毒軟體同齊買，兩項做伙買有優惠，我戇戇買loeh。後來才知機免另外買防毒軟體，拖累電腦效能niâ，無路用的物仔。

2逐工早時看著Pong — ê，我就感覺家己天下第一幸福。我醒過來，有時是伊踏我膀胱害我尿緊，有時枕頭邊仔伊嚓嚓趒袂輸地動，有時是伊倚近我鼻仔喙鬚插入鼻空穩當精神。起來頭一層代誌就是飼伊食早頓，伊若是食甲suh-suh叫，代表伊chín健康今仔日安啦。

飼兔仔了後，我心情好真濟。以早看báng-kah講鈣（bián）質食無夠，人就歹性地。這兩年我有逐工啉牛奶，鈣質補充夠額，情緒有影有較穩定，想代誌嘛會當想較深的。以早來洗欲來心肝悶焦焦、頭疼、腹肚疼，今攏無袂矣。鈣質敢若蓋有效的款。有一寡牌仔的牛奶我啉了會走腹，這時閣換一个牌仔試看莫，若是牛奶食袂慣勢食鈣片嘛真好。

3林美麗的《五爪佮我》，我本底想講看看咧就好。朋友駛車載我去斗六耍，踅田納西書店，以早來過就足佮意這間冊店，文具佮冊品質無輸台中，這個月出版的冊店內就有賣，台語冊嘛有這誠稀罕。以早讀《台語現代小說選》的有節錄《八卦紅之心》，讀了誠鬱卒，若讀了規本感覺可能著無仝。《五爪佮我》讀著故事真活就共買落來。作者台語寫甲真純，毋過有幾若字我毋知按怎唸，規氣買有聲冊做伙讀。看冊皮花矸的烏空神神祕祕，嘛若人的目睭仁烏烏看袂透。

人情世事誠濟人寫，角度徛無仝風景就無仝。藍春瑞《奪人的愛》讀著礙虐礙虐，台語是寫甲真媠氣啦，毋過就是無我的緣。查埔代言查某人定有這款症頭，親像徛天頂看人間，陳雷的小說嘛是。《五爪佮我》是佮查某人徛平懸看世間，逐句攏寫入心。