3尾兔仔：24／12／3

愛要與君共纏綿 Ài iáu ū kun kiōng tîⁿ-mî

（12／4寫）

1逐個月初，我都愛共Pong大洗籠仔。大洗就是共籠仔全拆開，浸蘇打水半點鐘，了後共水碗、飼料碗、草桶、chhū仔3塊、底盤2塊，屎桶鑢透透。逐禮拜小洗，意思是洗chhū仔、草桶kap底盤就好。逐工洗屎桶、水碗、飼料碗。

網路上揣飼兔仔的資料，定會有警告人莫飼兔仔的影片抑是文章。

起頭準備欲飼兔仔的時，我的確有予遐的文章嚇驚著。有佮兔兔窩的頭家參詳了後，知影兔仔毋是遐爾脆弱佮歹飼的動物仔，才決落來飼Pong。上重要的是愛揀著身體勇健的兔仔，按呢上蓋省工。了後我聽著幾若層飼兔仔的恐怖故事，因為兔仔佮咱人熟的貓仔狗仔足無仝，有真濟人無飼兔仔的知識致使in無知覺家己leh虐待兔仔，按呢活活予人苦毒死的兔仔閣袂少。閣有兔仔袂哮，有人叫是兔仔無情就亂擲「放死」佇街仔路。（寵物兔離開人類就是註死，放生就是放死）

警告人莫飼兔仔的道理，佮警告人莫去讀戲劇系的道理相𫝛，愛無心欲做的人較早死心，若真正有心別人阻擋嘛無效。

2最近leh允頭路。我誠實無心做工課，干焦想欲一个準時下班，莫傷忝頭的行政工課。親像 PETER MANN 的《動物出版社的人類小姐》，坐櫃台的小姐就是我的理想工課。PETER MANN夭壽愛耍仝一个台詞無仝類型的兩个故事，親像囡仔冊佮嬈肉本仝台詞，對照效果蓋趣味。伊的作品有足特別的笑詼。

冊店朋友予我做點鐘，去市仔排擔賣冊，有一个同事真主動招人客，伊見擺看著有人買冊路過伊的擔仔，伊隨借問：「你買啥物冊？」抑是呵咾人客的揹仔、衫仔好看，共人箍倚來伊的擔仔。有人講這个主動的同事是伊上驚的店員，伊若看著佮意的店，徛遠遠a相足久，無欲隨入去se̍h，若是店員主動共伊招伊就袂癮se̍h越頭走。我講伊按呢店員真歹做生理。伊講好的店員目睭愛利，知影siáng愛招呼，siáng免插。店員毋是簡單的工課。

3《愛要與君共纏眠》是大然版譯，吉永史以早的BL小說，1996年佇日本出版。看著花音佮大然予我足懷念的感覺。這个冊名翻譯嘛足有古早味。商業上吉永史這幾年無閣畫愛甲「頭殼歹去」的戀愛漫話，我舞袂著伊的同人誌，干焦會當讀《愛要與君共纏眠》來想《昨日的美食》，這本嘛有美食BL，主角的戀人是總鋪師！吉永史畫人的風格無啥改變，看袂siān的古典畫風，是用這本對照伊畫食物進步真濟！