3尾兔仔：24／12／23
用你的話講：Mother Tongue Manifesto
1若欲推薦三本，無查埔臭，台語媠氣，我的名單是：劉盈成《都柏林人》、洪秀昭《傲慢佮偏見》、溫若喬《浪鳥集》。王昭華的《我盡量，你隨意》足有名免講啦。王羅蜜多，我嘛足愛，毋閣伊有時仔嘛會予華語牽走。王羅蜜多這个名敢若咧共人考試，真歹講著。
2讀著劉盈成做圓仔姊《古早古早有一隻燈猴》台語顧問的感想。
有時仔有一種永遠抾捔的感覺。去看講台語的外國人，較有動力閣做落去。
進前美親先生共我口考了後，伊的話我是愈想愈艱苦，落尾伊共我講幾若擺你莫艱苦，先生人哪會遮爾有智慧。家己足拍拚咧做矣，猶是做甲無夠完美。我用聯經出版的《都柏林人》華文版本，佮台文版相對照看，去了解這兩个語言的精差，向望通予台語閣較正。
3參加一个蘇格蘭的母語宣言計畫，Gaelic佮台語作家寫短篇小說，作品過四層翻譯：台文、華語、英語佮Gaelic，終其尾成做對方的母語。坦白講我對蘇格蘭足無理解，今我頭殼內全是愛爾蘭的《都柏林人》，來去問看覓Gaelic作家有啥物推薦的作品。
