3尾兔仔：24／11／23

歇一下

（11／24寫，人傷忝）

1《始於極限》鈴木涼美kap上野千鶴子的書信集，鈴木自願去賣身，伊敢會當算做受害者？上野講正視家己的感受，毋才通去通同理別人，疼就愛喝出來，上野寫甲真著點，用簡單的文字就共歹剃頭的困擾講明白，讀著上野才感覺變老有智慧是足媠的代誌。

2去草率季，人的穿插敢若比作品較有性格，干焦看著烏白買是台文，好笑閣古錐，作者料算是足少年的阿妹仔。

單人電影室的體驗活動，導演佇懸懸坐佇的拆票台後壁，拆票台敢若是全世界上安全的所在，放映室崁烏布看袂著外口擋袂牢聲，那看電影那有四箍圍仔的人聲，看叫《1GB》的電影，大細嘛干焦1GB，主角嘛賰1GB的效能，siâng時有幾若的畫面，畫質低到一粒一粒像素走出來，原來頭腦直直咧轉咧慒心用畫面表現是按呢，落尾洗身軀了後踏佇一塊枋仔，我掠準是磅體重，結構彼是主角以早的面，踏過去就是全新的起頭，看完電影嘛有重生的感覺。

3讀《女伶的故事》，台語電影予國語政策拍壓的心酸史，規本漫話干焦「歹勢」是台語。以早台語的故事用華語來超譯，誠怪奇。這本冊確實有宣傳著國影中心有修復膠卷，干焦做著這爾，閣是一个故事予歷史佮功能食去的臺灣史作品。

推薦一个有歷史嘛有故事的好漫畫《一九四五夏末》，殖民的好䆀交織，日人台人講袂清又閣親的關係，台客日語輪流出聲，轉去彼个時代的風景佮氣味，重建正史落勾的篇幅，查某人。拄拄仔好《女伶》佮《一九四五夏末》攏有姊妹仔情，但是佗一个較有血有肉，一个看分明。