3尾兔仔：24／11／13

就中（naka-nuzuku）

1讀過向田邦子幾若本書，無啥予我動心。《向田邦子的情書》讀這有一種反作家糞埽桶的感覺。（你若愛伊就是反著寶，若無愛糞埽猶是糞埽）《靈長類人科動物圖鑑》我讀甲誠心適，人類觀察做甲真幼掠外，伊1929年出世，受戰前教育，佮台灣的日本時代有重疊，雖罔無講著台灣，藉著伊的冊去理解彼當陣佇日本的日本人，查埔佮查某是天差地遠，所謂的「父親大人」喔，伊寫甲詳盡。

〈就中〉leh講囡仔拄學著一个詞，煞著彼个詞，直直講，毋管敢有合文法佮語境無。我學著新台語的詞，嘛會想欲展一下。捷講毋才記會牢。有時仔嘛會講毋著。可比講我欲講安全帽掛佇跤踏車的頭，但是我毋知彼个部份欲按怎講，掠準講佮車仔控制方向的物仔仝款（寫小說學著的新詞），就講安全帽掛佇hăn-tó͘-luh。後來反字典發見彼叫龍頭。鐵馬毋是馬但是有龍頭。兔仔毋是雞母嘛袂孵卵，但是會曉雞母跍。

2國光劇團19年了後，原版演員閣來演《三个人兩盞燈》，媠甲不思義。我坐後面紮千里鏡看。進前看戲，若坐較後壁著看袂清表情，聽會著聲，看會著人，面煞霧霧，規个人若隔離離，感覺誠怪。這改看予真，熱戲迷迷去。真少看著用女性做主角的傳統戲劇。佇異性戀社會，兩个查某欲圓滿誠無簡單。寂寞、愛情遮ê詞啥人都會曉講，愛處理甲入心肝就歹扭搦囉。

3雙十一啥物嘛無賣，去兔兔窩買pong--ê ê飼料、溢生菌等等，伊逐日咧食的物仔。店家有買1111抽獎的活動，手伸入去大kha抽獎箱仔抐來抐去，球仔lo̍h-lo̍h叫，抽球仔看號碼換獎品。抽tio̍h pong--ê上愛的王梨。王梨心曝做乾，聽講tēng kah，兔仔食甲koaiⁿ-koaiⁿ叫。