3尾兔仔23／8／25
親愛ê資崩
1Chu-pong袂曉叫，煞通共我叫醒。
聲音愈倚近耳仔就放甲愈大聲，親像蠓仔haⁿ-haⁿ哮。
兔仔跳到我咧睏的枕頭。倚遐近聽著兔仔喘氣嘛大聲甲會驚人。伊拚命舐枕頭布，兔仔心情好就會舐物仔。伊佇遐ngia̍uh-ngia̍uh-sô，喙鬚仔毛仔插入我鼻空， ngia̍uh甲醒過來。浪漫小說寫，醒過來看著愛人的面有日頭光照著，是上幸福的代誌。我看著一隻兔仔頭攑懸懸，誠驕傲的款。兔仔w型的喙無好看著，愛覆落來比兔仔頭閣較低的角度才通看著。
伊若愛人摸就怙頭挵我手，準時早時六點腹肚枵，天然的亂鐘。
2真濟人若聽著我飼兔仔，就刁工共我講食兔仔肉的奇聞抑是風俗。無就是直接叫Pong-pong是一塊好食的肉。聽講四川人興食這味，兔仔無可能活咧離開四川。我聽著嘛袂佮人冤家掰會當做是修行。人看我冷凊凊就講袂loeh。愛兔協會有一篇文〈讓我們開始認識兔兔吧！〉頭一句就是：「時代咧進步，兔兔毋taⁿ是食--ê。」
飼狗仔貓仔的就袂聽著人欲食𪜶動物伴。
「動物攏仝款平等，毋過有一寡動物就是比其他動物閣較平等。」
動物佮查某人定是hōng看做一體，就是彼種無算是人的物仔，𪜶著愛犧牲奉獻家己。
定定聽著查某人講，𪜶翁罵伊恬恬，袂輸伊是𪜶翁的物仔。干焦𪜶翁通掠狂凊彩共伊詈，伊一句嘛袂當應。檢采真濟人聽過按呢的故事，抑是恁爸母就是按呢。
《使女的故事》毋taⁿ是性別，是霸權獨裁的故事，內底嘛有類似動物農莊這句話，上帝面頭前人人平等，有一寡人就是閣較有權。《使女》敢若是無望的故事，毋過閣較有權勢的帝國嘛有崩去彼工，歷史就是按呢寫的。
3資崩用台語唸是Chu-peng，華語是ㄗ ㄅㄥ或ㄗ ㄅㄥˋ，我家己是唸Chu-pong定定簡稱做Pong-pong，兔仔的名來自楊逵的大漢後生資崩。楊資崩有一个政治犯老爸，閣因為這个名咧戒嚴時代食較濟苦。
讀楊逵的《春光閘袂離》台語譯本，讀著滑溜，袂輸本成就是按呢寫。楊逵的華語作品讀著礙虐。其中有收錄規篇綠島家書，上悲傷的是遮的家書全無寄出去。〈鵝媽媽欲出嫁〉有改做囡仔音樂劇，我掠準講是歡樂的故事，結果不離仔心酸，是咧講有錢人佔人便宜，無納尾款害人giōng欲破產。
有一寡人失去人生，失去陪伴子女大漢的珍貴時光，受苦受難做無名屍。害人的煞較有權，是路名，是零角仔頂面的大頭，閣有人起廟共𪜶拜。阮袂當共別人落難當做是𪜶較衰。愛會記得若無拄好去，你嘛有可能落難，命運的轉盤遐無情。無知的人按怎死嘛毋知。