3尾兔仔23／8／25
核電公投、渺小一生、台語課
1 佯毋知就是共犯。
明明早著知影有問題，煞講白賊隱瞞事實，上予人慼心。
無絕對無彼號可能的代誌，台灣無彼个體質通承受核災，連埋核廢料的所在嘛揣無。8月23請去當票，堅定表達反核立場。
2 「我是家己人生中上無重要的彼个角色。」按呢的想法不時走出來。
這種感覺足奇怪的，親像家己干焦是一軀空殼。
《渺小一生》讀著若像日記，描寫平凡的日子，朋友，愛情，工課，聖誕假期一年過一年，煞予人一頁一頁讀loeh。主角裘德伊敢若啥物攏有矣，大律師事業成功，有厝有伴有好兄弟。半暝伊攑喙鬚刀仔割跤腿肉，褲捲放落來無人看會著伊有遐濟空喙。日子是幸福的，毋過伊認為家己無值得得著幸福，伊一工閣一工咧毀滅家己。伊心肝破一空足大空，hōng擲挕捒hōng蹧躂，若是對一開始就無愛共伊滋潤，了後予伊閣較濟愛嘛是流了了。
讀者若佮意這本小說，百面是佮意裘德，想欲知影遮爾好的人，哪會過甲遮艱苦，愈來愈倚近伊創傷的核心，伊性命嘛差不多燒到底，不可挽回。
朋友問我上佮意家己身軀佗一个所在。
我想一下，我佮裘德仝款上恨家己的跤。後來我看著有一寡查某，𪜶行路的姿勢佮我真相𫝛，毋過𪜶攏真有自信。逐人毋是完美的，有一寡人就是hōng惜命命，𪜶毋知hōng搤空的痛苦。
拄才佮我講話的人暴牙嚴重，喙齒生甲歪膏揤斜，看著予人真煩惱。
我喙齒天生生甲整齊閣白，半冬去予齒科先生看一擺，醫生攏呵咾我喙齒清氣閣媠。我共伊講喙齒上媠，進前我毋捌按呢想過。
後來想想咧，我上佮意家己的面，無人生甲親像我。
3「你愛對拜託人共你欣羨，成做你足好的，別人欣賞你是應該的。」
「你的作品頭一个讀者就是你家己。宣傳就是愛予人知影這有偌好。」
宣傳家己的作品，猶是予我感覺礙虐袂見笑。若是欲講別人有偌好就較簡單。
劉盈成先生的台文翻譯線頂課程（秋季）咧招生囉！
上劉先生的台語課了後，親像有高人指點，開竅。
當然嘛會當家己練習台華翻譯加強台語能力，讀劉盈成先生翻譯的《都柏林人》參照華語版。有先生本人來教，逐禮拜交宿題有壓力，按呢進步當然較緊嘛較完善。
台語的進階課真罕得看著，有文學佮外語專業的先生閣較少。有先生改作業，共複雜的文法、詞的語境講甲真好理解。發覺足濟以早無注意著，毋過真重要的所在。就準台語有考著證書分數嘛袂䆀，毋過寫出來的作品煞無成台語，無細膩去予華語牽去。劉先生的課，予你的台文創作氣口閣較正港、媠氣。