3尾兔仔13／9／25

台語上初的印象

3尾兔仔13／9／25

食台語頭路，想著家己細漢的台語環境，就是咧客廳聽阮阿媽佮厝邊五四三，倒剾正剾。爸母冤家大聲罵相挖空。對台語上初的印象是惡毒閣歹聽。

無人教我台語自然就聽有，無蓋𠢕講，環境所逼，戒嚴了後，台語無戒嚴，上好講華語，閣較好是講英語，台語無效莫學。小學有台語課，市仔內的同學攏驕傲講：「我不會說台語。」奇怪的是台語老師無煩惱咱無講台語，伊較煩惱雪山磅空開通，宜蘭腔會無去。

阿媽面白泡泡，食老頭鬃猶是烏金烏金，伊看著我面笑笑目睭微微，伊毋捌共我歹，敢若是仁慈的老大人，總是佮我講「狗語」，也就是足無標準的華語。毋過伊彼枝喙講台語就無仝矣，真𠢕共人吮空吮縫。我大漢了後去學台語了後，才發見阿媽可能毋是溫柔，是伊華語無啥會曉講，伊會當用華語做生理，講一寡簡單的詞，台語才是伊的心內話。

我真欣羨日本、一般國家，老大人佮少年人是講仝一款話，母語的環境，老大人講話佮頭腦較清楚。國語教育斬斷的毋taⁿ是語言，是民俗，是傳說，是記持，是靈魂，是祖孫仔的感情。

我若是有共台語學起來，就通閣較理解阿媽，無的確我佮阿媽感情會較好。

坦白講，我毋是足理解厝內人，阮無啥咧開講。性格慣勢袂合嘛是有影。阮母仔講伊佮阿媽都對我真好，無予我拚厝內。大漢了後我搬出來蹛，我足愛拚厝內。舊厝垃圾，食飯桌仔有虼蚻咧𬦰。到今我咧睏尿咧滾，定會夢著我人佇舊厝，揣無一間清氣的便所。

好好一間厝放予伊爛，毋願面對現實。怪厝內人按怎按怎，才愛一世人縛佇厝裡。今我若聽著啥人大人大種，閣甘願予厝內人管死死，我就無欲佮伊做朋友。

人愛家己揣活路，毋通萬事怪別人。

今台灣的大環境無鼓勵人講母語，我疼惜台灣，共母語閣抾轉來，袂輸是咧揣前世記持。愛共台灣了解透透，就是愛用台語，按呢才讀有台灣古早的文獻。我這馬通食台語頭路，愛感謝厝內人有講台語，予我有台語的底蒂。雖罔我這个不孝女這馬無啥佮𪜶聯絡。干焦是陪阮伴轉去宜蘭去看𪜶厝內人，我就會陷眠一禮拜睏袂好。我定定眠夢著故鄉，故鄉煞是恐怖故事。

打造台語的Ló͘-je-tha《Tâigael》新冊分享會，10／11（六）下晡2點，佇台中梓冊房。進前有臺南場，這改台中是進化場！來分享這本台蘇奇書按怎牽成，台文寫作翻譯閣有啥物鋩鋩角角？恭請逐家來參加！