3尾兔仔3／7／25
Lôo-Je-Tha、杯底不可飼金魚、心聲
Lôo-Je-Tha、杯底不可飼金魚、心聲
1 Tâigael作者愛創作閣兼翻譯，文章短短嘛是舞甲欲反去。
校對彼陣干焦注意家己負責的文章，提著冊發現有一个足幼路的設計，有四種語言台、ka-likh、英、華，頭一篇都是作者的母語，我的作品台文排第一，Elissa 的ka-likh khǹg頭前。
我足佮意〈空椅仔〉，這是聖誕故事，一般人想著過節攏足鬧熱，毋過這篇咧寫的是一張空椅仔咧等人客。信仰的本質超脫宗教束縛的規定，詩意迷人的箴言。故事地點是In-bo-nis，伊是在地人，伊共火把節的氣氛寫甲媠閣活潑。我那翻那學著足濟寫作技巧。
翻譯無比創作閣較簡單較省氣力。翻譯有「正確答案」，有本通參考，若是亂翻無盡力揣著上倚近正確的答案，對不起作者。這个案我有請阮小弟Khu Chùn Siâng做台文審定，伊英語好嘛小可學過ka-likh話。我作品予伊潤筆了後氣味全無仝。我真感恩伊相伨。Wind&Bones Books團隊足用心編輯對待阮的作品，in揀的字體有夠媠。我chín歡喜通參與Tâigael計畫。
7／12佇南渡策室我佮Naomi有新冊發表會，欲來分享翻譯這本冊拄著的文化、文法精差，翻譯的手路。
報名單
2我的亂鐘聲放Hena ma的《台灣人台灣事》，伊聲嗽溫柔閣軟，醒過來聽著伊的聲心安定，放音樂我會驚著。這站仔金馬獎真hang，拄好聽著36集新台語歌運動。〈杯底不可飼金魚〉（Poe-té m̄-thang chhī Kim-hî）這塊歌聽著足歡樂的款，創作背景煞是288。作曲者呂泉生向望外省本省同齊啉一杯，放落恩怨好好鬥陣。閣較慘的是，當時有四六事件，作詞人陳大禹是烏名單，為著莫予國民政府咧掠走，旋去中國。這塊歌咧勸酒，國民政府嫌傷快樂變禁歌。
《台灣人台灣事》一个集十幾分鐘短短仔，我那躽床那聽故事，真袂䆀。
3寫作足成祕結。無彼款靈感來隨寫了，想足久才想會通。就親像曾立馨〈學北管〉唱：「有閒來遮／罔挩罔挩就會曉」
一、兩年前曾立馨有發文寫金曲無入圍，伊真傷心。我足佮意伊《轉來的路》這張專輯，伊共傳統北管佮流行融合甲足好聽。不時共伊的歌放來聽。前一个頭路做甲無歡喜，上班心內那唱〈月娘〉：「家己的心聲／是啥物款的心情啊啊」
這陣仔鄭宜農的《圓缺》我迷甲深深，《水逆》我感覺無伊以早的台語歌好聽，《圓缺》比伊的華語歌閣較讚，足愛伊的電子樂。