3尾兔仔：24／11／3（晏）

A-sú chim

1人傷忝，iân延甲11/5寫。蟲仔chi̍p-chi̍p叫，誠有秋天的感覺。有時十一月袂輸熱天，今年有涼。逐改生日的時，我都會想著佇足熱的十一月，日頭黃錦錦，舊厝對面猶是牛排館，阮阿叔仔重複問：「今仔日你生日喔？」伊親像頭一擺知影。彼工佮平常日仝款，啥物攏無。

今仔日食著刺波仔雞卵糕，收著禮物是一个蠟燭，誠有做生日的款。

2若是共台語擲掉，代誌就會真簡單。我共代誌歹扭搦（liú-la̍k）講做扭掠（liú-lia̍h）的時，阮母干焦講：「你的台語足怪。我攏聽無你咧講啥。」伊袂共我按怎講正確，若是華語就愛教甲會曉。逐改予序大人嫌破台語，我暗想全是恁害的，攏是恁boăi佮恁孫、恁囝講台語，毋才一大堆爛台語。

台語寫作會的朋友chhōa阮去食，伊定去食的火鍋。伊用台語注文。頭家見擺袂輸頭一改看著伊，閣講一改少年人漚台語的偉大演講。阮彼个朋友攏無予顫悶著，繼續食好食的火鍋。我佩服伊，我定定因為一寡有的無的代誌，雄雄想著心肝若像予針揻著。我是袂閣去食彼間火鍋啦，想著彼頭家就袂癮食，管待伊菜有偌青、肉偌鮮沢

3予小鳳凰搬歌舞劇是天才。我足愛看伊唱歌跳舞。

看過小鳳凰搬遐濟電影，Arthur這个角色上吸引我，看伊搬的Arthur予我心肝phi-phok跳。看2改Joker 2，第二改去王牌電影院，上班日下晡干焦我一个人，綴Arthur笑閣哭，看甲chín入神。

小丑仔念做siáu-thiú-á，敢若真siáu（痟）。Joker 1伊上電視，夆問敢有啥物政治意圖，伊講無。伊誠實啥攏無咧想。伊袂堪得閣予傷害毋才刣人。Joker 1是Arthur個人的幻滅，Joker 2是逐家對小丑仔幻滅。小丑仔是變無步落尾的反擊。Joker 2頭前短短的動畫，就共劇情全講予清矣，毋過小鳳凰的表演猶是足迷人。

傳統戲劇那搬那唱，觀眾上愛的是聽演員唱歌，看跤步手路。故事是固定的無遐要緊，逐家早著知咧搬啥。現代戲有全新的劇本，觀眾反倒頭無愛聽唱歌，要意故事。Joker 2用歌舞搬幻想有夠合，有夠夢幻。

Joker 2唱歌跳舞的時機真好真自然。Joker 2中Arthur心聲成做歌詞，予觀眾聽明明。Joker 1用暴力畫面佮鬱卒的弦樂，來表現keng tiâu佇心肝內的鬱卒。Joker 2用唱歌做心情，tùi我來講情緒感染力閣較強。一般歌舞劇攏是烏暗行向光明，有歲的Arthur佇監獄唱少年人咧熱戀的歌，歌愈歡喜愈予人稀微的感覺。遐美麗的歌愈顯Joker 2悲慘的氣氛。共仝一種文本用透底相反的情景來表演，予人真奇妙，誠有深度的悲傷。

A-sú chim，是咧講Arthur chim人的方式。台語無捲喙舌Arthur變A-sú 。伊共人撐腮（thìⁿ-sai）倚過去chim的方式，我感覺足浪漫。我最近的快樂是叫情伴共我A-sú chim。