3尾兔仔：10／3
我要閃閃爍
1新聞講這个山陀兒風颱偌強拄偌強，台中市區這兩工不離仔四序，風小可透無落雨。這改風颱閣拄著大流，南部淹甲蓋慘。我細漢時宜蘭水治甲真好勢，無啥會淹，我看南部路流做溪，我做囡仔的時暗想敢若通耍水足好耍。這馬當然袂按呢想，路糊糜毋知愛摒偌久。
我愈來愈無法忍受飲食店的電視。新聞台報遐予人齷齪的無聊代，足濟是冤家抑是糾紛，我無佮意聽著。若是欲簡單食，我就佇厝裡家己煮煮咧。若是食好料，較貴的店就袂有電視聲佇邊仔吵。
2孫淑媚的新專輯《我要閃閃爍 我要當米蟲》，我聽著足佮意，曲佮詞予我足鮮足無仝的感覺。聽大崙訪問，孫淑媚講阿翔直直問伊的靈魂佇toeh。若共著獎予人看著閃閃爍却開莫講，寫甲有靈魂，確實是閣較要緊的代誌。
《老師你去吃一支菸我冷靜一下》我毋捌聽過唱甲遐好聽的怪歌。
3日本查某主動共查埔拚房間煮飯，親像是女朋友應該做的代誌？岡崎京子《Pink》佮角田光代的《銀之夜》，閣有我袂記得的幾若本作品都有寫著。這種愛不離仔有侵略性，愛甲若咧倖囝。
《銀之夜》的主題是女性友情，好的䆀的部份攏有寫著。李維菁的作品定定用負面的角度看查某之間關係。我毋是足佮意讀著描寫查某之間干焦惡意，女中就是查某人互相陷害的所在，絕對無女性友誼。實際上，我身軀邊上好的朋友全是女性，來往的對象嘛是查某較濟。後來讀著上野千鶴子《厭女》寫女性友誼，伊寫以早查某之間絕對無可能有友誼，因為in愛互相競爭搶查埔。現今毋是查某無倚靠查埔就活袂落去的時代，查某友誼總算出頭天。