3尾兔仔：10／23

關

1人講：「食緊挵破碗。」阮兜的Pong--ê會食碗做好耍。就準講伊真枵，草有夠伊食，伊若無聊，嘛有蘋果樹椏佮草仔chhū仔通耍夠氣，我無明白伊食碗啥物意思，碗墘仔予伊瞌甲一齒一齒。

2 蕾拉．司利馬尼的《夜裡的花香》細細一本，內容誠豐沛。作者是摩洛哥人，受法語教育的阿拉柏地區，伊用法語寫作蹛佇法國。In兜厝內嘛講法語，高等閣進步。我感覺真成日本時代的國語家庭。

伊講著查埔作家攏愛散步、慢走、行去外口se̍h-se̍h，伊偏偏仔愛室內，一个查某佇外口，伊感覺真無安全。女性問題是空間問題。

佇現今台灣社會，半暝佮朋友啉酒捋捋趖，我攏感覺真安全，無啥好煩惱。但是佇土國，敢若是Islam世界上進步的國家，家己若leh坐獄，關佇宿舍。查某出門足無安全的感覺。

舊年去看民族誌影展，《對媽媽說不出口的事》的導演，胡邁拉．比爾基斯有來，伊講去日本出張，半暝日本查某猶咧外口chhit-thô，伊認為日本女權真平等，台灣人聽著感覺複雜。東亞地區女性有空間的自由，旅行徙動的自由，確實比中東婦女關佇厝裡較好。在咱來看空間自由猶無夠，無算夠平權。

共作家關佇海關美術館睏一暝，這本冊源自這个計畫。作者寫囡仔時佇故鄉，親像一隻寵物飼佇厝裡，查某佇外口足危險。伊用出門來來感受自由，會堪得共安全感在先囥佇邊仔，半暝規間酒吧干焦伊一个查某爾。作家的理想工課環境，煞是共家己關起來，一心一意寫作，毋管世事毋管交陪。關抑是出門去，siáng有通出去，siáng愛予人關佇厝裡，作家深深思考這个問題。

3讀王秀容《我咧唱歌》台語散文，頭一篇〈奶母車內的天使〉，咧寫伊做月內。民俗禁忌，袂當出門，袂當洗身軀，袂當洗頭，閣有人共伊講拄生囡仔莫讀冊較好，為囡仔好伊全照做。我感覺這篇讀起來真恐怖，比作者寫伊囡仔時散甲欲予鬼掠閣跤恐怖。

查某拄生囝身體荏，關佇厝裡才安全，才袂穢著病。這个想法有通延伸做因為查某欲生囝，所以這袂當做彼袂動食。查某的身體全是為生囝。關係著查某的身體健康，定定嘛是牽去生囝去，生出父權的繼承人。人上初蹛的厝是子宮，彼厝佇真濟所在延伸做查某一生的監獄。