3尾兔仔：10／13

請你毋通共咱放袂記

1《鹽水大飯店》有一个角色阿德，伊本底無欲插政治，趁錢較要緊，寬寬仔落入政治的陰謀。發現政治閃袂離，毋是佯毋知就會ĕng得。伊轉變做啥物攏毋驚，反抗獨裁政權。予對政治無感覺成做有感覺的人，是這部戲上可貴的所在。

我固定看公視新聞，起頭欲翕的時有一條宣傳的新聞，演員受訪的時，台語講甲小可離離落落，但是戲中講甲真好，放心共看，真好聽的台語，台詞袂礙虐。《華麗計程車行》台語好劇情嘛好，毋過幾若段主角陳柏文講心中的理想，傷熱性聽甲起雞母皮。《鹽水大飯店》的感情表演，親情、人情、為義受苦嘛好，都自然予我感動。

若欲講一大欠點，攝影風格袂輸咧翕結婚相片。定咧翕日頭光爍爍，畫面質感唯美粉粉，看彼影像的感覺袂輸是《甜水大飯店》，真濟無必要的唯美，佮劇情無峇。阿純in稅的厝袂輸咖啡店，看著in兜就倒轉來2024年，閣有七彩焦燥花吊佇天篷做裝飾，是咧。

是講《鹽水大飯店》的片尾曲是孫淑媚唱的，有夠好聽。

2 閣讀一改中村明日美子《J的故事2》，才知家己太會遮煞心紅色麻索。我緊欲袂記得麻索本底的功能，現代都市人看著麻索就掠準欲縛人。

La̍k落去的一代（Beat generation）的文學，關係袂當適應美國資本主義的失敗者，關心受非主流、受壓迫的可憐人，追求心靈自由。讀《打字機是聖潔的：最完整的垮世代傳記》的時，我感覺in做的代誌離經甲足抽象。若用《J的故事》的故事來理解La̍k落去的一代就真好理解。

J生成查某的查埔囡仔，上愛Marilyn Monroe。J親像生做查埔的Monroe，妖嬌美麗脆弱。 In老爸因為經濟大落衰失業，癮酒強姦J。J袂輸是時代的受害者。In母發現in咧亂倫，銃殺in老爸自按呢起痟。J人生坎坷。伊天性愛媠，伊嘛知影按呢會予人看做無正常。落尾J的初戀愛人，拯救伊人生的白馬王子。

我重新讀《J的故事》足濟擺，這个作品予我相信毋管偌悲慘，絕對有真愛佮幸福。對我來講《J的故事》是讀了會透底改變人生的勵志作品。講這世界無情無愛的人，是顧人怨的大癮頭，莫怪無人愛。

3岡崎京子的《Pink》佮丸尾末廣《少女椿》，苦情少女總算等到白馬王子降臨，chhōa in脫離苦海，來去旅行快活一下。真僥倖，王子赴約半上路煞死去，少女痴痴等無人。這兩部的煞尾，攏是女主角提行李箱等仔等。幻滅上悲情，對光明希望墜落絕望深坑，彼距離偌長就偌傷心。

《少女椿》是蓋可憐，毋知小綠的人生欲按怎度，真正有夠絕望。《Pink》的由美我就無啥煩惱，伊性格不離仔儼硬，我相信伊lak入地獄嘛有通倒轉來。岡崎京子的《惡女羅漫史》的主角嘛有這款性命力，我足佩服伊畫的女主角，料想袂著，又閣活過來囉。